ویب ڈیسک: گورنر خیبرپختونخوا فیصل کریم کنڈی نے کہا کہ 9مئی کے ماسٹرمائنڈ کو بھی عدالتوں کا سامنا کرنا ہوگا اورسزا بھی ہوگی۔
گڑھی خدا بخش میں شہید بے نظیر بھٹو اور شہید ذوالفقار علی بھٹو کے مزارات پر حاضری کے موقع پر میڈیا سے گفتگو کرتے ہوئے فیصل کریم کنڈی نے کہا کہ خیبرپختونخوا حکومت کرم میں امن وامان قائم کرنے میں ناکام ہو چکی ہے، صوبائی حکومت کرم کا ایک روڈ نہیں کھول سکتی۔
گورنر خیبرپختونخوا فیصل کریم کنڈی کا مزید کہنا تھا کہ وزیراعلیٰ علی امین گنڈا پور وفاق پر حملہ کرنے کے بجائے صوبے پر توجہ دیں، خیبرپختونخوا کے مسائل آپ سب کے سامنے ہیں، خیبرپختونخوا میں امن و امان کی صورتحال ابتر ہے۔
پی ٹی آئی پر کڑی تنقید کرتے ہوئے فیصل کریم کنڈی نے کہا کہ پہلے کہتے تھے یہ فارم 47 والے ہیں، آج انہی سے مذاکرات کر رہے ہیں، اب این آر او کے لیے ہر کسی کے پاں پڑنا چاہتے ہیں۔
انہوں نے کہا کہ پی ٹی آئی نے ریاست کے خلاف جو کچھ کیا وہ کسی نے نہیں کیا، 9مئی حملوں میں ملوث شرپسندوں کو معاف نہیں کیا جا سکتا، ملک میں سزا و جزا کا عمل ضروری ہے۔
