ویب ڈیسک: فیصل آباد میں تاندلیانوالہ کے قریب دھند کے باعث کار گنے سے لدی ٹرالی سے ٹکرا گئی، اس حادثے میں ایک ہی خاندان کے 6افراد جاں بحق جبکہ 3 زخمی ہو گئے۔
اس حادثہ کے حوالے سے پولیس ترجمان کا کہنا ہے کہ حادثہ تالیانوالہ کے علاقے میں پیش آیا، جادثے کا شکار ہونے والی کار لاہور سے آ رہی تھی، اور اس میں بچے، خواتین اور ایک مرد سوار تھے، اس دوران راستے میں دھند کے باعث کار گنے سے لدی ٹرالی سے ٹکرا گئی۔
پولیس رپورٹ کے مطابق اس حادثے کے نتیجے میں کار میں سوار ایک خاتون رابعہ بی بی، اس کے بچے 13 سالہ فجر، 11 سالہ عمامہ، 6 سالہ یحییٰ، ایک سالہ موسیٰ اور کار میں سوار رشتہ دار ایک سالہ بچہ رئیس جاں بحق ہو گئے۔ دوسری طرف حادثے کے بعد ٹرالی کا ڈرائیور موقع سے فرار ہونے میں کامیاب ہو گیا جس کی تلاش جاری ہے۔
پولیس نے حادثے کے حوالے سے مزید بتایا کہ کار چلانے والا شخص شاہ زیب، بیوی اور بیٹے سمیت شدید زخمی ہیں، حادثے کے اطلاع ملنے پر پولیس اور ریسکیو اہلکاروں نے موقع پر پہنچ کر امدادی کارروائیوں میں بڑھ چڑھ کر حصہ لیا، اس دوران لاشیں اور زخمیوں کو ہسپتال منتقل کر دیا گیا۔
