ویب ڈیسک: مراکش کے ساحل پر کشتی الٹ گئی، اس حادثے میں ایک اندازے کے مطابق 69 افراد ہلاک ہو گئے، جن میں 25 شہری مالی کے بھی شامل تھے۔
غیر ملی خبر رساں ادارے کی رپورٹ کے مطابق حادثے کا شکار ہونے والی کشتی میں تقریباً 80 افراد سوار تھے، سمندر کے خطرناک سفر کے دوران مراکش کے ساحل پر کشتی الٹ گئی، جس سے 69 افراد جاں حق جبکہ صرف 11 افراد ہی زندہ بچ پائے۔
بیرون ملک مالی کے شہریوں کی وزارت کی جانب سے بتایا گیا ہے کہ اس مخدوش صورتحال پر نظر رکھنے کے لیے کرائسس یونٹ قائم کردیا گیا ہے۔ اس حادثے کے متاثرین میں اکثر کا تعلق مالی کے مغربی علاقے کائیس سے بتایا جا رہا ہے۔
ذرائع نے بتایا کہ مالی کے مغربی علاقے سے یہ لوگ تعمیراتی صنعت میں کام کی تلاش کے لیے موریطانیہ ہجرت کر گئے تھے۔
ذرائع کے مطابق حادثے کا شکار ہونے والوں نے یورپ اور امریکا میں موجود اپنے دوستوں کے ساتھ بات چیت کے بعد حوصلہ پا کر خطرناک سفر اختیار کیا۔ اس حوالے سے یہ بھی بتایا جا رہا ہے کہ موریطانیہ سفر کرنے والوں میں سے کچھ نے اپنے گھر والوں کو بتائے بغیر ہی خطرناک سفر کی راہ لی۔
