ویب ڈیسک: خیبرپختونخوا کے مشیر اطلاعات و نشریات بیرسٹر ڈاکٹر سیف نے وفاقی وزیر اطلاعات عطا تارڑ کے بیان پر ردعمل دیتے ہوئے کہا ہے کہ عطاتارڑ نے وفاق کا وائٹ پیپر کاپی کرکے خیبرپختونخوا کے کھاتے میں ڈال دیاہے، عطا تارڑ ہر روز کوئی نہ کوئی ایسی بات کرجاتے ہیں جس سے انکی نااہلی عیاں ہوجاتی ہے۔
بیرسٹر ڈاکٹر سیف نے اس حوالے سے مزید بتایا کہ کل وفاقی وزیر اطلاعات نے خیبرپختونخوا کی معیشت پر بات کر کے بڑے بڑے معیشت دانوں کی ہنسی نکال لی، عطاتارڑ نے وفاق کا وائٹ پیپر کاپی کرکے خیبرپختونخوا کے کھاتے میں ڈال دیاہے۔
انہوں نے کہا کہ خیبر پختونخوا کے قرضے وفاق کے مقابلے میں اونٹ کے منہ میں زیرے کے برابر بھی نہیں، خیبر پختونخوا کا کل قرضہ 725 ارب روپے ہے، جبکہ وفاق ہر مہینے اتنا ہی قرض لیتی ہے، اور تو اور شہباز شریف کے صرف دو سالہ دور اقتدار میں پاکستان کا قرضہ 27 ہزار ارب روپے بڑھا ہے۔
مشیر اطلاعات کا کہنا ہے کہ خیبر پختونخوا کا قرض بھی وفاقی حکومت کی نااہلی کی وجہ سے ہی بڑھا ہے، جعلی حکومت کے دور میں روپے کی قدر کم اور فارن کرنسی کی قیمت میں اضافہ ہوا ہے، اور یہی وہ وجہ ہے کہ تقریبا ساڑھے تین سو ارب روپے قرضہ بڑھا، ورنہ صوبے کا ٹوٹل قرضہ آج 400 ارب روپے ہوتا۔
بیرسٹر ڈاکٹر سیف نے بتایا کہ عطا تارڑ بے چارہ بیک وقت دو دو نوکریاں کرتا ہے، شہباز اور مریم دونوں کی نااہلیاں چھپاتا پھر رہا ہے، جس سے اس کی اپنی کارکردگی شدید متاثر ہو رہی ہے۔
صوبائی مشیر نے بتایا کہ عطا تارڑ کی جانب سے خیبر ہختوننخوا میں صحافیوں کے خلاف کارروایی کی بات بھی مضحکہ خیز ہے، صحافی تو اسلام اباد میں محفوظ نہیں، اس حوالے سے مطیع اللہ جان کی مٹال سب کے سامنے ہیں، جعلی حکومت کی فسطائیت کیوجہ سے ہی صحافی بیرون ممالک مقیم ہیں۔
بیرسٹر ڈاکٹر سیف نے صوبائی کارکردگی بیان کرتے ہوئے کہا کہ گزشتہ نو مہینوں میں صحت کارڈ پر 7 لاکھ 80 ہزار سے زائد مریضوں کا علاج ہوچکا ہے، انہوں نے بتایا کہ یونیورسٹیوں کا چانسلر وزیر اعلی کو اس لئے بنایا گیا ہے کہ گورنر وائس چانسلرز کی تعیناتی میں روڑے اٹکا رہے تھے۔
سوشل میڈیا کے حوالے سے بیرسٹر ڈاکٹر سیف نے کہا کہ سوشل میڈیا پر اربوں خرچ کرنے والی بات مریم نواز کی حد تک ٹھیک ہوسکتی ہے، لیکن خیبر پختونخوا میں ایسا کچھ نہیں، گزشتہ نگران حکومت نے سوشل میڈیا کے حوالے سے بہت کوشش کی، مگر کچھ ہاتھ نہیں آیا تھا۔
