ویب ڈیسک: چترال میں شدید خشک موسم کے بعد بارشوں کا آغاز ہوگیا جب کہ پہاڑوں پر برف باری کا سلسلہ بھی شروع ہو گیا ہے ۔
ذرائع کے مطابق چترال شہر اور مضافات میں گزشتہ رات سے بارش اور پہاڑوں پر برفباری جاری ہے اس دوران لواری ٹنل پر 5 انچ تک برف پڑ چکی ہے۔
کالاش ویلیز،لٹکوہ کے علاقے گرم چشمہ، بگوشٹ ،پیرا بیگ ، نارکوریت ،ژیتور، مڈکلشٹ گولین وغیرہ جیسے مقامات پر برفباری مسلسل ہو رہی ہے۔
دوسری جانب این ایچ اے کی جانب سے لواری ٹنل پر برف صفائی کا کام بھی ساتھ ہی شروع کردیا گیا ہے۔
واضح رہے کہ چترال میں شدید خشک موسم کے بعد تقریبا ڈیڑھ ماہ کے وقفے کے بعد دوبارہ بارشیں اور برفباری کا آغاز ہوا ہے، جس کے سبب سردی میں غیر معمولی اضافہ ہوگیا ہے۔
بارش اور برفباری سے سوختنی لکڑی کی مانگ بڑھ گئی اور اس کی منہ مانگی قیمت پر فروخت کا سلسلہ شروع ہوگیا ہے۔
