ویب ڈیسک: 26نومبر کے تذکرہ پر اپیکس کمیٹی میں شہبازشریف اور گنڈاپور میں تلخ کلامی، تفصیلات کے مطابق دوران اجلاس وزیراعظم نے 26 نومبر کے واقعے کا ذکر کرتے ہوئے مظاہرین پر گولی نہ چلانے کی وضاحت کی، جس پر وزیراعلیٰ خیبرپختونخوا علی امین گنڈا پور نے اعتراض کیا۔ اس موقع پر شہبازشریف اور گنڈاپور میں تلخ جملوں کا تبادلہ بھی ہوا۔
وزیراعظم شہباز شریف کی زیر صدارت نیشنل ایکشن پلان کی ایپیکس کمیٹی کا ایک اہم اجلاس منعقد ہوا جس میں وزرائے اعلیٰ، سول اور آرمی چیف جنرل عاصم منیر اور انٹیلی جنس ایجنسیوں کے سربراہان سمیت دیگر اہم عہدیدار شریک ہوئے۔
دوران اجلاس وزیراعظم نے 26 نومبر کے واقعے کا ذکر کرتے ہوئے مظاہرین پر گولی نہ چلانے کی وضاحت کی۔ وزیر اعلیٰ سردار علی امین گنڈا پور نے وزیراعظم کی وضاحت پر اعتراض کیا، اور یوں 26نومبر کے تذکرہ پر اپیکس کمیٹی میں شہبازشریف اور گنڈاپور میں تلخ کلامی کا واقعہ رونما ہوا۔
اجلاس کے اختتام کے بعد علی امین گنڈا پور نے کہا کہ اجلاس میں طے کیا ہے دہشتگردی کا مل کر خاتمہ کریں گے۔ 26 نومبر پر اپنا موقف وزیراعظم کے سامنے رکھا، ہمارے 45 لوگ لاپتہ ہیں، خدشہ ہے شہید نہ ہوئے ہوں۔
گنڈاپور نے کہا کہ ایک سیاسی جماعت پر گولیاں برسائی گئیں، وزیراعظم کہہ رہے ہیں کچھ نہیں ہوا، بانی پی ٹی آئی ملک کی خاطر مذاکرات کر رہے ہیں۔ بعدازاں علی امین گنڈا پور نے کہا 26 نومبراحتجاج سے متعلق کمیشن بنانے کا مطالبہ کیا گیا ہے، کرم اورافغانستان کے حوالے سے بھی بات ہوئی ہم افغانستان کے حوالے سے قبائلی عمائدین کوساتھ لیکر جرگہ کرنے کے خواہشمند ہیں۔
