مذاکرات جاری رہیں گے

عمران خان کو سزا ہوجاتی ہے تو بھی مذاکرات جاری رہیں گے، شیخ وقاص

ویب ڈیسک: پاکستان تحریک انصاف کے سیکرٹری اطلاعات وقاص اکرم شیخ نے کہا ہے کہ اگر 6جنوری کو عمران خان کو سزا ہو بھی جاتی ہے تو مذاکرات کا عمل جاری رہے گا۔
پشاور میں پریس کانفرنس کرتے ہوئے شیخ وقاص اکرم کا کہنا تھا کہ ہم سے سول نافرمانی تحریک کے حوالے سے پوچھا جا رہا ہے، سول نافرمانی تحریک کی کال بانی چیئرمین کی طرف سے تھی، مذاکرات میں جو مطالبات پیش کئے گئے ہیں سول نافرمانی تحریک ان سے مشروط ہے۔
شیخ وقاص اکرم نے کہا کہ سول نافرمانی کی تحریک ملک نہیں بوگس حکومت اور نااہل وزیر اعظم کے خلاف ہے۔ انہوں نے کہا کہ بانی چیئرمین کو معلوم ہے سول نافرمانی تحریک سے لوگوں کو مشکلات ہیں۔
انہوں نے کہا کہ سول نافرمانی تحریک کا پہلا فیز جاری ہے، سول نافرمانی کی تحریک بیرون پاکستانیوں کے لیے ہے، بیرون ممالک پاکستانیوں کے اہل خانہ کو دھمکیاں دی جا رہی ہیں، 3 ماہ میں معلوم ہو جائے گا سول نافرمانی تحریک کے کیا اثرات ہیں۔
سیکرٹری اطلاعات پی ٹی آئی کا کہنا تھا کہ جن کے پاس عوامی مینڈیٹ نہیں انہیں حکومت دے دی گئی، انسانی حقوق کی خلاف ورزی کی گئی، سول کا ملٹری ٹرائل کیا گیا۔
انہوں نے کہا کہ تحریک انصاف مسلح تنظیم نہیں یہ ملک کی بڑی سیاسی جماعت ہے، سول نافرمانی تحریک کی نہ واپسی ہے نہ لچک دکھائیں گے، مذاکرات میں جو مطالبات پیش کئے گئے ہیں سول نافرمانی تحریک ان سے مشروط ہے۔
انہوں نے کہا کہ 6جنوری کو بانی چیئرمین کو سزا نہیں ہونی چاہیے، اگر خان کو سزا ہو بھی جاتی ہے تو مذاکرات کا عمل جاری رہے گا۔
وقاص اکرم شیخ نے کہا کہ ملٹری کورٹس سے کارکنوں کی رہائی میں ڈیل کا کوئی چکر نہیں، کارکنوں کی رہائی کوئی خیر سگالی نہیں۔

مزید پڑھیں:  کرک میں‌فائرنگ ،سابق پولیس آفیسر ساتھی سمیت قتل