ویب ڈیسک: وزیر اعلی خیبر پختونخوا سردار علی امین گنڈاپور کی جانب سے کرم واقعہ پر افسوس کا اظہار کرتے ہوئے واقعے کی شدید مذمت کی، انہوں نے کہا کہ کرم واقعہ میں ملوث عناصر کیخلاف سخت کارروائی ہوگی، انہوں نے واقعہ کے حوالے سے اعلی حکام سے رپورٹ طلب کر لی۔
وزیر اعلی خیبرپختونخوا نے ڈی سی کرم اور دیگر زخمیوں کی جلد صحت یابی کے لئے نیک خواہشات کا اظہار کرتے ہوئے کہا کہ کرم امن معاہدے کے بعد اس طرح کا واقعہ انتہائی افسوسناک اور قابل مذمت ہے، یہ علاقہ میں حکومت کی جانب سے کی جانے والی امن کوششوں کو سبوتاژ کرنے کی دانستہ اور مذموم لیکن ناکام کوشش ہے۔
علی امین گنڈاپور نے کہا کہ فائرنگ میں ملوث عناصر کیخلاف سخت کارروائی ہوگی، یہ واقعہ ان عناصر کی کارستانی ہے جو کرم میں امن کی بحالی نہیں چاہتے، لیکن صوبائی حکومت کرم میں امن کی بحالی اور عوام کو درپیش مشکلات کو حل کرنے کے لئے پر عزم ہے۔
انہوں نے کہا کہ فریقین کے درمیان معاہدہ اس بات کا ثبوت ہے کہ کرم کے لوگ پرامن ہیں، اور وہ علاقے میں امن چاہتے ہیں، تاہم کچھ شرپسند عناصر کرم میں امن کی بحالی نہیں چاہتے، ان عناصر کی کوشیں قطعی کامیاب نہیں ہونگی، صوبائی حکومت اور علاقے کے لوگ مل کر ایسے شرپسند عناصر کی مذموم کوششوں کو ناکام بنائیں گے۔
وزیراعلیٰ نے مزید کہا کہ علاقے کے لوگ ان عناصر کی نشاندہی اور انہیں کیفر کردار تک پہنچانے میں حکومت اور انتظامیہ کے ساتھ تعاون کریں، اس افسوسناک واقعے سے کرم میں امن کی بحالی کے لئے حکومت اور علاقہ عمائدین کی کوششیں متاثر نہیں ہونگی، صوبائی حکومت علاقہ عمائدین کے تعاون سے علاقے میں مکمل امن کی بحالی تک کوششیں جاری رکھے گی۔
