ویب ڈیسک: ایئر چیف مارشل ظہیر احمد بابر سدھو نے کراچی میں نیوی کیڈٹس کی پاسنگ آوٹ پریڈ کی تقریب سے خطاب کرتے ہوئے کہا ہے کہ پاک فضائیہ خطے میں طاقت کے توازن کو مستحکم کررہی ہے، جبکہ ہمیں عالمی سطح پر مختلف چیلنجز سے نمٹنے کیلئے ہمہ وقت تیار رہنا ہوگا۔
ایئرچیف مارشل کا کہنا تھا کہ پاک فضائیہ خطے میں طاقت کے توازن کو مستحکم کررہی ہے، پریڈ میں ڈسپلن اعلیٰ تربیت کا مظہر ہے، پاس ہونے والے تمام کیڈٹس کو مبارکباد پیش کرتا ہوں، خطے میں توازن برقرار رکھنا ہماری ذمہ داری ہے، ہمیں تمام درپیش چیلنجز کا ڈٹ کر مقابلہ کرنا ہے۔
انہون نے کہا کہ مضبوط معیشت، مضبوط دفاع کیلئے ضروری ہے، جبکہ اللہ کے فضل و کرم سے پاکستان کی معیشت مضبوط ہوتی جا رہی ہے۔ جدید ہتھیاروں اور ٹیکنالوجی کے استعمال کی تربیت بھی ضروری ہے، عالمی برادری کو چاہئے کہ مسئلہ کشمیر کے حل کیلئے کردار ادا کرے۔
ظہیر احمد بابر سدھو کا کہنا تھا کہ عالمی برادری کو بھارت پر زور دینا چاہئے کہ وہ کشمیر میں مظالم کا سلسلہ بند کرے، غزہ میں بھی انسانی حقوق کی پامالی ہورہی ہے، جسے بند ہونا چاہئے۔
یاد رہے پاکستان نیول اکیڈمی میں 122ویں مڈشپ مین ،30 ویں شارٹ سروس کمیشن کورس کی پاسنگ آؤٹ پریڈ ہوئی جس میں ایئر چیف مارشل ظہیر احمد بابر سدھو نے بطور مہمان خصوصی شرکت کی اور پریڈ کا معائنہ کیا۔
