ویب ڈیسک: صوبہ پنجاب کی وزیر اطلاعات عظمیٰ بخاری کا کہنا تھا کہ امن معاہدے کے باوجود ڈپٹی کمشنر پر حملہ قابل مذمت ہے، کچھ قوتیں ایسی معلوم ہوتی ہیں جو نہیں چاہتیں کہ کرم میں امن قائم ہو۔
انہوں نے کہا کہ اڈیالہ جیل میں قیدی پر زیادہ فوکس ہونے کی وجہ سے صوبائی حکومت کی صوبے میں رٹ ختم ہوگئی ہے، علی امین گنڈاپور کو دو ماہ میں ایک مرتبہ بھی کرم جانے کی توفیق نہیں ہوئی۔ معلوم ہوتا ہے کہ وہاں رٹ ختم ہو چکی ہے۔
پنجاب کی وزیر اطلاعات کا کہنا تھا کہ مریم نواز کو پارا چنار کے بہن بھائیوں کی فکر لاحق ہے، جبکہ وہاں حالات مختلف ہیں، تحریک انصاف 12 سال سے خیبرپختونخوا میں برسراقتدار ہے، اس دوران خیبرپختونخوا کے عوام کا معیار زندگی کا گراف مزید نیچے گر گیا۔
عظمیٰ بخاری کا کہنا تھا کہ خیبرپختونخوا میں امن و امان، دہشتگردی اور بیروزگاری جیسے بنیادی مسائل پورے عروج پر ہیں، اس سے ثابت ہوتا ہے کہ تحریک انصاف نے پشتونوں کو احساس محرومی کے علاوہ کچھ نہیں دیا۔ امن معاہدے کے باوجود ڈپٹی کمشنر پر حملہ قابل مذمت ہے.
