ویب ڈیسک: خیبرپختونخوا میں سیکیورٹی فورسز کے 3 مختلف آپریشنز کے دوران 19 خارجی دہشتگردوں کو ہلاک کر دیا، جبکہ فائرنگ تبادلے کے دوران پاک فوج کے 3 جوان شہید ہو گئے۔
پاک فوج کے شعبہ تعلقات عامہ آئی ایس پی آر کی جانب سے جاری بیان میں کہا گیا ہے کہ 6 اور 7 جنوری کو دہشت گردوں کی موجودگی کی اطلاع پر خیبرپختونخوا میں تین الگ الگ کارروائیوں میں 19 خارجی دہشت گردوں کو ہلاک کر دیا گیا۔
آئِی ایس پی آر کے مطابق خوارج کی موجودگی کی خفیہ اطلاع پر سیکیورٹی فورسز کی جانب سے ضلع پشاور کے علاقے متنی میں آپریشن کیا گیا، اس دوران سیکیورٹی فورسز کی جانب سے دہشت گردوں کے ٹھکانے پر مؤثر طریقے سے کارروائی کی گئی۔
پاک فوج کے شعبہ تعلقات عامہ کے مطابق اس کارروائی میں 8 خوارج ہلاک کر دیئے گئے۔
آئِی ایس پی آر کے مطابق خیبرپختونخوا کے ضلع مہمند کے شہری علاقے بائیزئی میں بھی خفیہ اطلاعات کی بنیاد پر سیکیورٹی فورسز نے کارروائی کی، اس دوران دہشت گردوں سے فائرنگ کا بھرپور تبادلہ ہوا۔ اس کارروائی میں بھی 8 خوارج ہلاک کر دیئے گئے۔
پاک فوج کے شعبہ تعلقات عامہ آئی ایس پی آر کے مطابق ضلع کرک میں تیسری کارروائی کی گئی، اس کارروائی کے دوران سیکیورٹی فورسز نے خارجہ دہشت گردوں کے مقام کو مؤثر انداز سے نشانہ بنایا اور 3 دہشت گردوں کو ہلاک کیا گیا۔
ترجمان پاک فوج کے مطابق دہشتگردوں کیساتھ فائرنگ کے تبادلے میں وطن کے 3 بہادر سپوت جام شہادت نوش کر گئے، ان شہداء میں گلگت بلتستان کے ضلع غذر کے 38 سالہ لانس حوالدار عباس علی، ضلع سکردو کے 37 سالہ نائیک محمد نذیر، ضلع اٹک کے 37 سالہ نائیک محمد عثمان شامل ہیں۔
آئی ایس پی آر کی جانب سے بتایا گیا ہے کہ علاقے میں پائے جانے والے کسی بھی خارجی دہشت گرد کو ختم کرنے کے لیے کارروائیاں جاری ہیں۔ پاکستان کی سیکیورٹی فورسز ملک سے دہشت گردی کی لعنت ختم کرنے کے لیے پرعزم ہیں۔
آئی ایس پی آر کے مطابق ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔
یاد رہے کہ خیبرپختونخوا میں سیکیورٹی فورسز کے 3 مختلف آپریشنز کے دوران 19 خارجی دہشتگردوں کو ہلاک کر دیا، جبکہ فائرنگ تبادلے کے دوران پاک فوج کے 3 جوان شہید ہو گئے۔
