ویب ڈیسک: خیبرپختونخوا کے مشیر اطلاعات و نشریات بیرسٹر ڈاکٹر سیف نے مریم نواز کے بیان پر ردعمل دیتے ہوئے کہا ہے کہ عمران خان بننے کے بجائے مریم نواز کو عوامی مسائل پر توجہ دینی چاہیے، مریم نواز "Nepo Baby” ہیں، جو عمران خان بننے کی ناکام کوشش کررہی ہے۔
انہوں نے کہا کہ عمران خان شریف خاندان کے اعصاب پر سوار ہیں، انہیں خواب میں بھی عمران خان نظر آتے ہیں، عمران خان بننے کے بجائے مریم نواز کو عوامی مسائل پر توجہ دینی چاہیے، ان کا کہنا تھا کہ پنجاب کا پیسہ عوام پر خرچ ہونے کے بجائے لندن منتقل ہو رہا ہے۔
بیرسٹر ڈاکٹر سیف نے مزید کہا کہ خیبر پختونخوا میں عوام کا پیسہ عوام کی فلاح و بہبود پر خرچ ہو رہا ہے، وزیراعلیٰ سردار علی امین گنڈاپور کی قیادت میں خیبر پختونخوا پہلا قرض اتارنے والا صوبہ بن گیا ہے، انہوں نے بتایا کہ جو لیڈر سردرد کے علاج کے لیے بھی لندن جاتا ہو، وہ عوام کے لیے کیا کرے گا؟
مشیر اطلاعات کا کہنا ہے کہ چچا اور بھتیجی دونوں وفاقی اور صوبائی خزانے کو لوٹنے میں مصروف ہیں، شریف خاندان کے منی لانڈرنگ قصے زبان زدعام ہیں، اب کی بار تو جعلی حکومت نے کرپشن کے ساتھ ساتھ لاقانونیت کو بھی خوب فروغ دیا ہے۔
