ویب ڈیسک: 9مئی مقدمات میں پی ٹی آئی رہنما و قائد حزب اختلاف قومی اسمبلی عمر ایوب و دیگر کی بریت درخواستوں پر فیصلہ محفوظ کر لیا گیا۔
تفصیلات کے مطابق انسداد دہشتگردی عدالت سوگودھا کی جانب سے 9 مئی کے 6 مقدمات میں قائد حزب اختلاف قومی اسمبلی عمر ایوب و دیگر کی بریت درخواستوں پر فیصلہ محفوظ کر لیا گیا ہے۔ اے ٹی سی سرگودھا میں اپوزیشن لیڈر قومی اسمبلی عمر ایوب، اپوزیشن لیڈر پنجاب اسمبلی ملک احمد خان بھچر، عالیہ حمزہ اور صنم جاوید سمیت دیگر کیخلاف میانوالی میں درج 6 مقدمات کی سماعت ہوئی، اس دوران مختلف علاقوں سے آئے 150 سے زائد ملزمان عدالت میں پیش ہوئے۔
اس دوران نامزد ملزمان کی جانب سے ان کے وکلاء نے حاضری معافی کی درخواست دی، دوسری جانب وکلاء صفائی نے ملزمان کی بریت درخواستوں پر بحث بھی مکمل کر لی۔ بعدازاں عدالت نے ملزمان کی حاضری معافی کی درخواست منظور کرتے ہوئے آئندہ سماعت پر ملزمان کی حاضری یقینی بنانے کا حکم دیدیا ، اس کے ساتھ ہی اے ٹی سی نے مزید سماعت 17 جنوری تک ملتوی کردی۔
