ویب ڈیسک: وزیراعظم شہباز شریف نے کہا ہے کہ پاکستان معاشی استحکام کے بعد معاشی ترقی کے راہ پر گامزن ہو چکا، آج ملکی معیشت کا پہیہ جام کرنے کا نعرہ لگانے والوں کے دعوے ہوا ہوئے۔
وزیراعظم شہباز شریف نے ترسیلات زر میں ریکارڈ اضافے پر قوم کو مبارک باد دیتے ہوئے کہا کہ پاکستان معاشی استحکام کے بعد معاشی ترقی کے راہ پر گامزن ہو چکا۔
ان کا کہنا تھا کہ دسمبر 2024 تک 3.1 بلین ڈالر ترسیلات زر وصول ہوئیں جو نومبر 2024 سے زیادہ ہیں، دسمبر 2023 سے دسمبر 2024 تک ترسیلات زر میں 29.3 فیصد کا ریکارڈ اضافہ ہوا ہے۔
شہباز شریف نے مزید کہا کہ ترسیلات زر میں ریکارڈ اضافہ ہمارے بیرون ملک پاکستانیوں کے عزم کی سند ہے، آج ترسیلات زر میں ریکارڈ اضافے سے ثابت ہو گیا ہے کہ ملکی ترقی درست سمت میں جا رہی ہے، جبکہ اس دوران ملکی معیشت کا پہیہ جام کرنے کا نعرہ لگانے والوں کے دعوے دھرے کے دھرے رہ گئے۔
وزیراعظم نے مزید کہا کہ حکومتِ پاکستان ملکی ترقی اور عوامی فلاح و بہبود کے لیے پُر عزم ہے۔ ہم نے پہلے دن سے ملکی ترقی کیلئے جو کوششیں شروع کر رکھی تھیں، آح اس کے ثمرات ملنا شروع ہو گئے ہیں۔
