ویب ڈیسک: اے ٹی سی پشاور کی جانب سے پولیس پر فائرنگ کے کیس میں کامران بنگش پر فرد جرم عائد کر دی گئی۔
تفصیلات کے مطابق پولیس پارٹی پر فائرنگ کیس میں نامزد پی ٹی آئی کے سابق صوبائی وزیر کامران بنگش کے مقدمے کی سماعت اے ٹی سی جج اسد اللہ نے کی۔ اے ٹی سی پشاور کی خصوصی عدالت کی جانب سے پولیس پر فائرنگ کے کیس میں پی ٹی آئی کے رہنما کامران بنگش پر فرد جرم عائد کر دی گئی۔
دوران سماعت پراسیکیوشن نے کہا کہ تھانہ چمکنی پولیس نے پی ٹی آئی کے روپوش رہنماء مراد سعید کی گرفتاری کے لیے کامران بنگش کے حجرے پر چھاپہ مارا تھا، اس دوران کامران بنگش اور دیگر ساتھیوں نے پولیس پارٹی فائرنگ کی تھی، جس سے دو پولیس اہلکار زخمی ہوگئے تھے۔
اس موقع پر پراسیکیوشن نے استدلال کیا کہ واقعہ 20 دسمبر 2023 کو پیش آیا تھا، اور اس پر کامران بنگش اور دیگر کے خلاف دہشت گردی کا مقدمہ درج کیا گیا، اس کے بعد تحقیقات مکمل کر کے پولیس نے چالان عدالت میں پیش کردیا۔
دوران سماعت عدالت نے پولیس پر فائرنگ کرنے کے مقدمے میں پی ٹی آئی رہنما پر فرد جرم عائد کر دی، جبکہ ملزم نے صحت جرم سے انکار کر دیا۔ بعد ازاں عدالت نے استغاثہ گواہان طلب کرتے ہوئے مقدمے کی مزید سماعت 20 جنوری تک ملتوی کردی۔
یاد رہے کہ عدالت نے فرد جرم عائد ہونے کے بعد ملزم کے خلاف باقاعدہ ٹرائل شروع کردیا۔
