ویب ڈیسک: پاکستان تحریک انصاف کے مرکزی رہنما اور سابق سپیکر قومی اسمبلی اسد قیصر نے کہا ہے کہ مریم نواز اور خواجہ آصف مذاکرات ناکام بنانا چاہتے ہیں، جبکہ ہم نے ملک کی خاطر ایک قدم آگے بڑھاتے ہوئے کم مطالبات کے ساتھ مذاکرات کرنے کی حامی بھری۔
صوابی میں ایک تقریب سے خطاب میں ان کا کہنا تھا کہ مذاکرات کے حوالے سے حکومت کے مختلف دعوے سامنے آ رہے ہیں، جس طرح مریم نواز اور خواجہ آصف بات کر رہے ہیں، ان سے لگتا ہے کہ وہ ہر ممکن طریقے سے مذاکرات ناکام بنانا چاہتے ہیں، اور پھر کہا جاتا ہے کہ عمران خان ٹویٹ کر رہے ہیں۔
اسد قیصر نے کہا کہ ہم مظلوم پارٹی ہیں، ہمارے ساتھ ظلم ہوا ہے، 26 نومبر کو ہمیں اپنے بنیادی حق سے محروم کیا گیا، نہتے شہریوں پر گولیاں چلائی گئیں، 9 مئی کے حوالے سے بھی جو رویہ ہمارے ساتھ رکھا گیا، اس حوالے سے بھی ہم مظلوم ہیں۔
سابق سپیکر قومی اسمبلی نے کہا کہ ہمارے لوگوں کو ملٹری کورٹس میں سزائیں دی گئیں، حالانکہ سویلین کو کسی صورت ملٹری کورٹس سے سزائیں نہیں دی جاتیں، اس سب کچھ کے باوجود عمران خان پر الزام لگایا جا رہا ہے۔
پی ٹی آئی رہنما نے بتایا کہ ان حالات کے باوجود ہمارے جو تحفظات اور مطالبات تھے، ہم نے ان میں کمی کی تاکہ ملک آگے بڑھے، آج ملک جن حالات سے گزر رہا ہے، اس کا ادراک کرنا چاہئے، آج ملکی سرحدات کی جو صورتحال ہے، ملکی معیشت کے جو حالات ہیں، اس کو دیکھ کر اندازہ ہوتا ہے کہ ملک میں مایوسی کا راج ہے۔
ان کا کہنا تھا کہ ہم نے پاکستان کی خاطر ایک قدم آگے بڑھنے کی کوشش کی، میں واضح کرنا چاہتا ہوں کہ ہم کسی خوف میں مبتلا ہیں، نہ ہم کسی سے ڈر رہے ہیں، اگر ہم نے اپنے تحفظات پیچھے دھکیل رکھے ہیں تو صرف پاکستان کی خاطر، پھر بھی ہم پر الزامات لگائے جا رہے ہیں۔
ممبر قومی اسمبلی نے بتایا کہ حکومت نے وعدہ کیا تھا کہ عمران خان سے ہماری ملاقات کرائی جائے گی، لیکن اب اپنے وعدے پر یوٹرن لیتے ہوئے حکومت کی جانب سے مختلف حیلے بہانے تراشے جا رہے ہیں۔ ہم چاہتے ہیں کہ ملک میں آئین کی حکمرانی ہو، آزاد عدلیہ ہو، ملک میں سول سپرمیسی ہو اور مضبوط پارلیمنٹ ہو۔
اسد قیصر نے کہا ہے کہ ملک کو حقیقی معنوں میں عوام کی مرضی کے مطابق چلایا جائے، ہم ہر صورت اپنے مؤقف پر قائم ہیں، عمران خان اس وقت پاکستان نہیں بلکہ پوری دنیا میں بڑے لیڈر بن کر ابھر رہے ہیں، جیل میں عمران خان جو صعوبتیں اور مشکلات برداشت کر رہے ہیں، وہ سب ملک کے لیے کر رہے ہیں۔
ان کا مزید بتانا ہے کہ پوری قوم عمران خان کے ساتھ کھڑی ہے، مذاکرات کے حوالے سے ہماری کمٹمنٹ ہے، اس لیے اعتماد سے بات کر رہے ہیں، مریم نواز اور خواجہ آصف جو باتیں کر رہے ہیں، اس پر انتہائی افسوس ہے، ہم جو کچھ کر رہے ہیں، پاکستان کے لیے کر رہے ہیں۔
