ویب ڈیسک: سابق وفاقی وزیر اور سینیٹرفیصل واوڈا نے کہا ہے کہ190ملین پاؤنڈ کیس میں عمران خان کو سزا ضرور ہوگی ۔
کراچی میں میڈیا سے گفتگو کرتے ہوئے سینیٹرفیصل واوڈا نے کہا ہے کہ 190ملین پاؤنڈ سے متعلق عمران خان کوکہا تھا یہ نہ کریں، بانی پی ٹی آئی نے دستخط کیے تھے، کس نے یہ کروایا تواب کوئی نہیں مانے گا۔
پریس کانفرنس کے دوران فیصل واوڈا کا کہنا تھا کہ پی ٹی آئی رہنما عمران خان کیخلاف سازشوں میں ملوث ہیں اور خود بانی کوجیل میں رکھنا چاہتے ہیں۔
انہوں نے کہا کہ پروپیگنڈا کیا گیا عمران خان سے بیک ڈور مذاکرات ہو رہی ہیں، کہا گیا بانی پی ٹی آئی کی اہلیہ مذاکرات کو لیڈ کر رہی ہیں۔
فیصل واوڈا نے کہا کہ پی ٹی آئی نے غنڈہ گردی اوردھرنے کرکے دیکھ لیے، کوئی فائدہ نہیں ہوا، عمران خان سے بارہا کہا کہ حواری آپ کونہ صرف قید میں رکھنا بلکہ مروانا چاہتے ہیں۔
ان کا کہنا تھا کہ عمران خان کو190ملین پاؤنڈ کیس میں سزا ضرورہوگی، 190ملین پانڈ اوپن اینڈ شٹ کیس ہے، پی ٹی آئی کو20جنوری کومایوسی کے سوا کچھ نہیں ملے گا۔
سابق وفاقی وزیر نے کہا کہ مقبول ہونے کا مطلب قانون سے بالاتر ہونا نہیں ہے، مذاکرات کا سب سے بڑا حامی ہوں، جمہوریت کا حسن ہی بات چیت ہے، مذاکرات میں بے ایمانی نہیں ہونی چاہیے، پی ٹی آئی والے مذاکرات کے مزے لے رہے ہیں، بانی پی ٹی آئی کوکوئی ایگزیکٹوآرڈرنہیں ملے گا۔
