190ملین پاؤنڈز کیس

190ملین پاؤنڈز کیس تاریخ کا میگا کرپشن کیس ہے،عطاء تارڑ

ویب ڈیسک: وفاقی وزیر اطلاعات عطا اللہ تارڑ نے کہا ہے کہ 190ملین پاؤنڈز کیس پاکستان کی تاریخ کا میگا کرپشن کیس ہے ،ہیرے کی انگوٹھیاں، القادر ٹرسٹ کے لیے زمین، اس کیس سے منسلک ہیں۔
وفاقی وزیر اطلاعات عطاء اللہ تارڑ نے سینیٹر طلال چوہدری کے ہمراہ پریس کانفرنس کرتے ہوئے کہا کہ 190ملین پاؤنڈز کیس کا آج فیصلہ ہونا تھا لیکن ملزمان عدالت میں پیش نہیں ہوئے انہوں نے عدالتوں میں پیش نہ ہونے کی عادت بنا لی ہے۔
انہوں نے کہا کہ عدالتی کیسز میں تاخیری حربے استعمال کرنا ان کا وتیرہ رہا ہے ان عناصر نے مقدمات کو طول دینے کے لیے تمام حربے استعمال کیے ہیں انہیں کابینہ میں بند لفافہ لے کر جانے کی کیا ضرورت تھی؟۔
عطا اللہ تارڑ نے کہا کہ فارن فنڈنگ کیس میں 6 سال تک غیر حاضری اور تاخیری حربے استعمال کیے گئے توشہ خانہ کیس میں بھی انہوں نے تاخیری حربے استعمال کیے۔ کبھی وکیل تبدیل کیے تو کبھی وکالت نامے تبدیل کیے گئے۔
وفاقی وزیر اطلاعات و نشریات کا مزید کا کہنا تھا کہ 190ملین پاؤنڈز کیس پاکستان کی تاریخ کا میگا کرپشن کیس ہے تاریخ میں اتنی بڑی کرپشن کی مثال کہیں نہیں ملے گی ہیرے کی انگوٹھیاں، القادر ٹرسٹ کے لیے زمین، اس کیس سے منسلک ہیں۔ یہ محض اتفاق نہیں تھا، سوچا سمجھا منصوبہ تھا۔
وفاقی وزیر نے کہا کہ بند لفافے میں منظوری وہ لیتا ہے جسے ڈر ہو، اس طرح اربوں روپے معاف کرنے کی تاریخ میں مثال نہیں ملتی، فراڈ ٹرسٹ کے ذریعے بلیک منی کو وائٹ کیا گیا۔
اس موقع پر سینیٹر طلال چوہدری نے پریس کانفرنس میں کہا کہ کرپشن کو اسلامی ٹچ دینا پی ٹی آئی کا طریقہ واردات ہے بانی چیئرمین پی ٹی آئی اور ان کی اہلیہ توشہ خانہ لوٹ کر کھا گئے۔ پی ٹی آئی والے مقدمات کا سامنا کرنے کے بجائے ڈیل کا تاثر دیتے ہیں۔

مزید پڑھیں:  پاکستان6ماہ میں آئی ایم ایف کی بڑی شرائط پوری کرنےمیں کامیاب