ویب ڈیسک: فیڈرل بورڈ آف ریونیو ( ایف بی آر )نے اپنے افسران کے لئے 6ارب روپے مالیت کی نئی گاڑیاں خریدنے کا فیصلہ کیا ہے۔
سامنے آنے والی دستاویز کے مطابق ایف بی آر نے 1010 نئی گاڑیاں خریدنے کے لیے کمپنی کو لیٹر آف انٹینٹ لکھ دیا ہے جن کی لاگت 6 ارب روپے سے زیادہ ہو گی جس کے تحت نئی گاڑیوں کی خریداری 2 مراحل میں ہو گی۔
گاڑیوں کی خریداری کے لیے 3 ارب روپے کی پیشگی ادائیگی کی جائے گی،3ارب روپے 500 گاڑیوں کی مکمل ادائیگی کے طور پر تصور کیے جائیں گے۔
خط میں کہا گیا ہے کہ 500 گاڑیوں کی پہلی کھیپ کی ترسیل کے بعد بقیہ ادائیگی کی جائے گی،1010گاڑیوں کی ڈلیوری جنوری سے مئی 2025 کے دوران کی جائے گی۔
پہلے مرحلے میں جنوری میں 75، فروری میں 200 گاڑیاں ڈلیور کی جائیں گی جب کہ مارچ میں 225 گاڑیوں کی ڈلیوری کی جائے گی۔
دوسرے مرحلے میں اپریل میں 250 اور مارچ میں 260 گاڑیاں ڈلیور کی جائیں گی۔
ترجمان ایف بی آرحکام کا کہنا ہے کہ گاڑیوں کی خریداری ایف بی آر کے ٹرانسفارمیشن پلان کا حصہ ہے۔
انہوں نے کہا کہ گاڑیاں فیلڈ افسران کی استعداد کار بہتر بنانے کے لیے لی جا رہی ہیں،گاڑیاں صرف فیلڈ افسران کے لیے ہوں گی۔
