ویب ڈیسک: متحدہ عرب امارات کے مزید تین قافلے امدادی سامان لیکر غزہ میں داخل ہو گئے ۔
مقامی میڈیا کی رپورٹ کے مطابق متحدہ عرب امارات کے تین امدادی قافلے مصر کے رفح بارڈر کراسنگ کے ذریعے غزہ پہنچ گئے جو فلسطینی عوام کی حمایت کے لئے آپریشن الفارس الشہم 3 کے تحت فراہم کیے گئے۔
امدادی قافلوں میں 35 ٹرک شامل تھے، جن میں 248.9 ٹن سے زائد امدادی سامان موجود تھا، اس میں 100 ٹن سے زائد طبی سامان شامل ہے، جن میں ڈائلیسز مشینیں، الٹراساونڈ ڈیوائسز، بحالی کے آلات، وہیل چیئرز، سانس لینے کے ماسک، طبی استعمال کے سامان اور مختلف قسم کی دوائیاں شامل ہیں۔
خوراک، پناہ کے لیے خیمے، آٹا اور دیگر ضروری اشیا بھی امداد کا حصہ ہیں، آپریشن الفارس الشہم 3 کے تحت غزہ کی پٹی میں داخل ہونے والے امدادی قافلوں کی مجموعی تعداد 153 تک پہنچ گئی ہے، جو 2,391 ٹرکوں پر مشتمل ہیں۔
اب تک اس آپریشن کے تحت فلسطینی عوام کو 29,274 ٹن سے زائد امداد فراہم کی جا چکی ہے، جس سے خاص طور پر غزہ میں سب سے زیادہ متاثرہ گروہوں کی مشکلات کو کم کرنے میں مدد ملی ہے۔
