ویب ڈیسک: پاکستان میں پولیو کا ایک اور کیس جیکب آباد سے رپورٹ ہو گیا، اس مرض کے پھیلنے کے حوالے سے ماہرین صحت کی جانب سے والدین پر اپنے بچوں کو پولیو سے بچاو کے قطرے پلانے پر زور دیا گیا ہے۔
ذرائع کے مطابق بچے میں معذوری کی علامات 27 دسمبر 2024 کو ظاہر ہوئیں، حالانکہ گزشتہ سال ماہ دسمبر میں چلائی جانے والی پولیو مہم کے دوران 98 فیصد ہدف حاصل کیا گیا، اور اس دوران 3 کروڑ 57 لاکھ سے زائد بچوں کو پولیو سے بچاؤ کے قطرے پلائے گئے۔
نیشنل ای او سی کے مطابق سال نو 2025 کی پہلی قومی انسدادِ پولیو مہم فروری کے پہلے ہفتے میں شروع کی جائے گی۔ اس حوالے سے نیشنل ای او سی کی جانب سے والدین سے پرزور اپیل کی گئی ہے کہ وہ اپنے 5 سال سے کم عمر بچوں کو پولیو سے بچاو کے قطرے ضرور پلوائیں۔
ماہرین طب کا کہنا ہے کہ پاکستان میں پولیو کا ایک اور کیس جیکب آباد سے رپورٹ ہونا اس بات کی جانب اشارہ کرتا ہے کہ پولیو کیخلاف اقدامات مزید سخت کرنے ہونگے، دسمبر میں منعقد ہونے والی پولیو مہم کے دوران 98 فیصد ہدف حاصل کیا گیا۔
ماہرین صحت نے والدین پر زور دیا ہے کہ وہ اپنے بچوں کو پولیو سے بچاو کے قطرے پلانے میں کوتاہی نہ کریں تاکہ اس مہلک بیماری کو جڑ سے اکھاڑ پھینکا جا سکے۔ صحت حکام نے جیکب آباد میں پولیو مہم کو مزید مؤثر بنانے کے لیے اقدامات کی ہدایت کی ہے، کیونکہ وہاں اس حالیہ کیس نے کوششیں ناکافی ہونے یا بیماری کی شدت بڑھنے کا اشارہ دیا ہے۔
