ویب ڈیسک: بنگلا دیش کی مسلح افواج کے پرنسپل سٹاف آفیسر لیفٹیننٹ جنرل قمر الحسن نے وفد کے ہمراہ پاکستان کا دورہ کیا، اور اعلیٰ عسکری قیادت سے ملاقاتیں کیں، اس دوران پاکستان اور بنگلہ دیش کی فوجی قیادت نے تعلقات مضبوط بنانے کا اعادہ کیا۔
پاک فوج کے شعبہ تعلقات عامہ آئی ایس پی آر کے مطابق بنگلا دیش کی مسلح افواج کے پرنسپل سٹاف آفیسر (پی ایس او) نے سربراہ پاک فوج جنرل سید عاصم منیر سے ملاقات کی اور خطے میں ابھرتے سلامتی کی صورتحال پر تبادلہ خیال کیا۔
آرمی چیف جنرل عاصم منیر نے جنوبی ایشیا اور خطےمیں امن واستحکام کے فروغ کیلئے مشترکہ کوششوں کی اہمیت کا عزم کرتے ہوئے کہا کہ دونوں ممالک باہمی تعاون پر مبنی دفاعی اقدامات کے ذریعے علاقائی سلامتی میں اپنا کردار ادا کرتے رہیں گے۔
آئی ایس پی آر نے بتایا کہ پاکستان اور بنگلہ دیش کی فوجی قیادت کا تعلقات مضبوط بنانے کا عزم، دو طرفہ مضبوط دفاعی تعلقات کی اہمیت پر بھی زور دیا گیا۔ ملاقات میں دونوں برادرممالک کے درمیان پائیدار شراکت داری بڑھانے پر اتفاق کیا گیا۔
بنگلہ دیش کے پی ایس او لیفٹیننٹ جنرل قمرالحسن نے پاک فوج کی غیرمعمولی پیشہ ورانہ مہارت کی تعریف کی اور دہشت گردی کیخلاف جنگ میں پاک فوج کی بے پناہ قربانیوں کو سراہا۔
ماقبل بنگلا دیش کی مسلح افواج کے پرنسپل سٹاف آفیسر لیفٹیننٹ جنرل قمرالحسن نے چیئرمین جوائنٹ چیفس آف سٹاف کمیٹی جنرل ساحر شمشاد مرزا سے ملاقات کی اور دوطرفہ دفاعی تعاون اور سٹریٹیجک امور پر تبادلہ خیال کیا۔
آئی ایس پی آر کے مطابق ملاقات میں دونوں ممالک کے درمیان دوطرفہ دفاعی تعاون بڑھانےکے امور پر بات چیرت کی گئی، اور فریقین نے دونوں ملکوں کے درمیان فوجی تعلقات مضبوط بنانے کی اہمیت پر زور دیا۔ ملاقات میں فریقین کے مابین اس شراکت داری کو کسی بھی بیرونی رکاوٹ سے محفوظ رکھنے، علاقائی امن، سلامتی اوراستحکام کے فروغ کیلئے تعاون جاری رکھنے کی ضرورت پر اتفاق کیا گیا۔
پاک فوج کے شعبہ تعلقات عامہ کے مطابق جنرل ساحر شمشاد مرزا کا کہنا تھاکہ دونوں ممالک محفوظ اور خوشحال مستقبل کے لیے مشترکہ وژن رکھتے ہیں، اس وژن کی بنیاد مضبوط دفاعی تعاون ہے۔
