ویب ڈیسک: خیبرپختونخوا میں احساس نوجوان پروگرام کے تحت بلاسود قرضوں کی فراہمی شروع کر دی گئی۔
تفصیلات کے مطابق نوجوانوں کو با روزگار اور خودمختار بنانے کے لئے صوبائی حکومت کا ایک سنگ میل عبور، احساس نوجوان پروگرام کے تحت بلاسود قرضوں کی فراہمی شروع کر دی گی، اس حوالے سے نوجوانوں کو بلاسود قرضوں کے چیکس تقسیم کرنے کی تقریب کا انعقاد کیا گیا۔ وزیر اعلی خیبر پختونخوا علی امین گنڈاپور تقریب کے مہمان خصوصی تھے۔
وزیر اعلی سردار علی امین گنڈاپور نے تقریب میں اپنے کاروبار شروع کرنے کے لئے نوجوانوں میں بلاسود قرضوں کے چیکس تقسیم کئے۔ اس موقع پر انہوں نے کہا کہ احساس نوجوان پروگرام، نوجوانوں کو باروزگار اور با اختیار بنانے کا فلیگ شپ منصوبہ ہے۔
انہوں نے کہا کہ پروگرام کے تحت نوجوانوں کو اپنے کاروبار شروع کرنے کےلئے بلاسود قرضے فراہم کئے جا رہے ہیں، یہ تین سالہ منصوبہ ہے، جس پر 3 ارب روپے کی لاگت سے عملدرآمد شروع کیا گیا، اس پروگرام پر عملدرآمد کے لئے رواں بجٹ میں ایک ارب دس کروڑ روپے مختص کئے گئے ہیں۔
وزیر اعلی خیبرپختونخوا نے مزید کہا کہ پروگرام کے پہلے حصے پر بینک آف خیبر کے اشتراک سے عملدرآمد کیا جارہا ہے، جس کے تحت ایک ارب روپے کی لاگت سے نوجوانوں کو بلاسود قرضے فراہم کئے جا رہے ہیں، پروگرام کے اسی حصے میں 18 سے 35 سال تک تین سے پانچ نوجوانوں پر مشتمل کلسٹرز کو 10 سے 50 لاکھ روپے تک کے قرضے فراہم کئے جارہے ہیں۔
ان کا کہنا تھا کہ ان قرضوں کی واپسی کےلئے آٹھ سالوں پر مشتمل آسان شیڈول رکھا گیا ہے، پہلے 20 ماہ گریس پیریڈ ہوگا، جس کے دوران کوئی وصولی نہیں ہوگی، پروگرام کے دوسرے حصے پر اخوت مائیکرو فنانس بینک کے اشتراک سے عملدرآمد کیا جارہا ہے، جس کی لاگت دو ارب روپے ہے۔
سردار علی امین گنڈاپور نے مزید کہا کہ پروگرام کے اس حصہ میں 18 سے 40 سال تک کے افراد کو چھوٹے پیمانے پر کاروبار شرو ع کرنے کےلئے ایک لاکھ سے 5 لاکھ روپے تک کے بلاسود قرضے فراہم کئے جارہے ہیں، پروگرام کے تحت نوجوان خواتین اور خصوص افراد کے لئے کوٹہ مختص کیا گیا ہے۔
خطاب کرتے ہوئے انہوں نے کہا کہ اس کے علاوہ تین مختلف پروگرامز احساس اپنا گھر پروگرام، احساس روزگار پروگرام اور احساس ہنر پروگرام بھی جلد شروع کئے جا رہے ہیں، احساس پروگراموں کےلئے رواں بجٹ میں مجموعی طور پر 15 ارب روپے مختص کئے گئے ہیں۔
وزیراعلیٰ سردار علی امین گنڈاپور نے بتایا کہ ہمارا ویژن اور مشن ایک خود مختار قوم اور خود کفیل ملک ہے، ہم نے بانی چیئرمین کے وژن کے مطابق نوجوانوں کو باروزگار بنانے کے لئے احساس نوجوان پروگرام شروع کیا ہے، نوجوانوں ملازمت سے زیادہ اپنا کاروبار شروع کرنے پر توجہ دیں۔
انہوں نے بتایا کہ کاروبار میں ترقی کرنے کے بے پناہ مواقع موجود ہوتے ہیں، کاروبار کے مواقع ہم فراہم کریں گے، نوجوانوں آئیڈیاز لائیں، نوجوان محنت کو اپنا شعار بنائیں، کیونکہ محنت کا کوئی متبادل نہیں۔
