بالائی علاقوں میں کڑاکے کی سردی

بالائی علاقوں میں کڑاکے کی سردی، موٹرویز اور ٹرین شیڈول متاثر

ویب ڈیسک: ملک بھر کے بالائی علاقوں میں کڑاکے کی سردی پڑ رہی ہے، خیبر پختونخوا سمیت بلوچستان کے بعض علاقوں میں برف باری کی وجہ سے پارہ منفی 12 تک گر گیا، جبکہ دوسری طرف دھند کے باعث موٹرویز اکثر مقامات پر بند کر دی گئی ہے۔
ذرائع کے مطابق ملک بھر میں سردی کی شدت برقرار ہے، محکمہ موسمیات کی جانب سے شمال مغربی بلوچستان میں چند مقامات پر ہلکی بارش اور برف باری کا امکان ظاہر کیا گیا ہے، کوئٹہ، چمن، زیارت، پشین، قلعہ عبداللہ اور دیگر علاقوں میں بھی بارش کا امکان ہے۔
دوسری طرف بالائی علاقوں میں کڑاکے کی سردی پڑ رہی ہے، لہہ میں درجہ حرارت منفی 12، گوپس منفی11، استور اور سکردو میں منفی 10، کالام میں درجہ حرارت منفی 7 تک گر گیا، ان کے ساتھ ساتھ ہنزہ میں منفی6، بگروٹ منفی5، چترال اور دیگر علاقوں میں منفی 4 ڈگری سینٹی گریڈ درجہ جرارت ریکارڈ کیا گیا۔
ادھر ملک کے مختلف شہروں میں دھند کا راج ہے، اور حد نگاہ کم ہونے پر موٹر ویز اکثر مقامات سے بند کر دی گئی ہے، جبکہ متعدد مسافر ٹرینوں کا شیڈول بھی اس سے متاثر رہا ہے۔
موٹر ویز کلی اکثر مقامات پر بندش کے حوالے سے ترجمان موٹر وے پولیس نے بتایا ہے کہ حد نگاہ کم ہونے کے باعث موٹر وے ایم ون پشاور سے صوابی جبکہ ایم ٹو لاہور سے خانقاہ ڈوگراں اور ایم 3 لاہور سے درخانہ تک ٹریفک کیلئے بند کر دی گئی ہے۔
اس کے علاوہ لاہور اور گردونواح میں شدید دھند کے باعث مسافر ٹرینوں کا شیڈول بھی متاثر ہوا ہے، حد نگاہ کم ہونے پر متعدد ٹرینیں تاخیر کا شکار ہوئیں جس سے مسافروں کو پریشانی کا سامنا کرنا پڑ رہا ہے۔

مزید پڑھیں:  سپریم کورٹ کے سابق جج شیخ عظمت سعید کی نماز جنازہ ادا