ویب ڈیسک: وزیر اعلی خیبر پختونخوا سردار علی امین گنڈاپور کی زیر صدارت صوبائی کابینہ کا 20واں اجلاس منعقد ہوا، جس میں وزیراعلیٰ کی جانب سے تمام انتظامی محکموں کو جاری فنڈز کا سو فیصد استعمال یقینی بنانے کی ہدایت کی گئی ہے۔
صوبائی کابینہ اجلاس میں کابینہ اراکین، چیف سیکرٹری، ایڈیشنل چیف سیکرٹریز اور متعلقہ انتظامی سیکرٹریز شریک ہوئے، اس دوران موجودہ کابینہ کے فیصلوں پر عملدرآمد کی صورتحال پر بریفنگ دی گئی۔
صوبائی کابینہ اجلاس میں بریفنگ کے دوران وزیراعلیٰ کو بتایا گیا کہ اب تک موجودہ کابینہ کے کل 19 اجلاس منعقد ہوئے، جن میں 518 اہم فیصلے کئے گئے ہیں، ان میں سے 486 فیصلوں پر مکمل طور پر عملدرآمد کیا جا چکا ہے، جو 95 فیصد بنتا ہے۔
بریفنگ کے دوران بتایا گیا کہ ان فیصلوں میں سے 7 پر مقررہ ٹائم لائینز کے مطابق کام جاری ہے، جبکہ 15 فیصلوں پر عملدرآمد تاخیر کا شکار ہے، اجلاس میں بریگن کے بعد وزیر اعلی سردار علی امین گنڈاپور کی جانب سے کابینہ کے فیصلوں پر عملدرآمد کی مجموعی صورتحال پر اطمینان کا اظہار کیا گیا۔
وزیراعلیٰ خیبرپختونخوا سردار علی امین گنڈاپور نے کہا کہ جن محکموں سے متعلق فیصلوں پر ابھی تک عملدرآمد نہیں ہوا، وہ محکمے اگلے اجلاس تک ان فیصلوں پر عملدرآمد یقینی بنائیں، انتظامی محکمے جاری شدہ ترقیاتی فنڈز کے سو فیصد استعمال یقینی بنانے کے لئے اقدامات کریں۔
انہوں نے کہا کہ اب تک جاری شدہ ترقیاتی فنڈز کے استعمال کی مجموعی شرح تسلی بخش ہے، تاہم اسے مزید بہتر بنانے کی ضرورت ہے، انہوں نے ہدایت کی کہ کابینہ اراکین عوامی مسائل کے حل کے لئے اپنے متعلقہ ریجنز میں باقاعدگی سے دورے کریں۔
وزیر اعلی سردار علی امین گنڈاپور کا کہنا تھا کہ ان دوروں میں متعلقہ منتخب عوامی نمائندوں کو بھی مدعو کئے جائیں، کابینہ اراکین اپنے اپنے محکموں کے پوٹنشیلز کو موثر انداز میں استعمال میں لانے کے لئے اقدامات اٹھائیں۔ صوبائی کابینہ اجلاس میں وزیراعلیٰ کی جانب سے تمام انتظامی محکموں کو جاری فنڈز کا سو فیصد استعمال یقینی بنانے کی ہدایت کی گئی ہے۔
