ٹورازم پولیس کے اہلکاروں کو مستقل

ٹورازم پولیس کے اہلکاروں کو مستقل کرنے کا اعلان، تنخواہوں میں بھی اضافہ

ویب ڈیسک: وزیر اعلیٰ خیبرپختونخوا سردار علی امین گنڈا پور کی جانب سے ٹورازم پولیس کے اہلکاروں کو مستقل کرنے کا اعلان کر دیا گیا ہے، اس حوالے سے بورڈ اجلاس میں ٹورازم پولیس کے اہلکاروں کی ماہانہ تنخواہ 36 ہزار روپے سے بڑھا کر 45 ہزار روپے کرنے کی منظوری بھی دے دی گئی۔
ٹورازم پولیس کو مزید مستحکم کرنے کے لیے ہیوی بائیکس اور کمیونیکیشن گیجٹس بھی فراہم کرنے کا فیصلہ کیا گیا ہے۔
وزیراعلیٰ خیبرپختونخوا نے محکمہ سیاحت کے حکام کو مزید سیاحتی مقامات دریافت کرنے کے لیے بھی اقدامات کی ہدایت کر دی، علی امین گنڈا پور نے کہا ہے کہ اگلے مالی سال کے بجٹ میں کم از کم چار نئے سیاحتی مقامات کو ترقی دینے کے منصوبے شامل کیے جائیں۔
علی امین گنڈا پور کا مزید کہنا تھا کہ گزشتہ سیزن میں ڈیڑھ کروڑ ملکی اور غیر ملکی سیاحوں نے خیبر پختونخوا کا رُخ کیا، سیاحوں کی بڑھتی تعداد کے پیش نظر صوبے میں نئے سیاحتی مقامات کو ایکسپلور کرنے کی ضرورت پر بھی زور دیا گیا ہے۔ اسی لئَے وزیر اعلیٰ نے ٹھنڈیانی انٹیگریٹڈ ٹورازم زون کے ماسٹر پلان میں ضروری ترامیم کر کے مشتہر کرنے کی بھی ہدایت کی۔
اس سلسلے میں انہوں نے انٹیگریٹڈ ٹورازم زونز کے لیے رابطہ سڑکوں کی بیک وقت تعمیر کے لیے اقدامات کی ہدایت بھی کی ہے تاکہ سیاحت کو مکمل فروغ دیا جا سکے۔
وزیراعلیٰ خیبرپختونخوا سردار علی امین گنڈا پور نے کہا کہ سیاحت کا شعبہ ترجیحی شعبوں میں شامل ہے، اس شعبے میں روزگار اور سرمایہ کاری کی وسیع استعداد موجود ہے۔
علی امین گنڈاپور کی زیر صدارت ہونے والے خیبر پختونخوا کلچر اینڈ ٹورازم اتھارٹی کے بورڈ آف ڈائریکٹرز کے اجلاس میں صوبائی کابینہ اراکین زاہد چن زیب، بریگیڈیئر ریٹائرڈ مصدق عباسی ، ایڈیشنل چیف سیکریٹری پلاننگ و ڈویلپمنٹ کے علاؤہ دیگر بورڈ ممبران نے شرکت کی۔

مزید پڑھیں:  عمران خان کا آرمی چیف کو تیسرا خط،انتخابی دھاندلی کا معاملہ اٹھادیا