ویب ڈیسک: غزہ جنگ بندی معاہدہ 3 مراحل پر مشتمل ہوگا، اس حوالے سے تفصیلات سامنے آگئیں۔ ممکنہ تفصیلات کے بارے میں بتایا گیا ہے کہ غزہ جنگ بندی معاہدہ 3 مراحل پر مشتمل ہوگا، جس کا پہلا مرحلہ 6 ہفتوں پر محیط ہے۔
معاہدے کے مطابق پہلے مرحلے کے دوران اسرائیلی فوج غزہ کی سرحد کے اندر 700 میٹر تک خود کو محدود کر لے گی۔ اس مرحلے میں اسرائیل تقریباً 2000 فلسطینی قیدیوں کو بھی رہا کرے گا جن میں عمر قید کے 250 قیدی بھی شامل ہوں گے۔
جنگ بندی معاہدے کے اس پہلے مرحلے میں غزہ میں موجود 33 اسرائیلی مغویوں کو بھی رہا کیا جائے گا۔ اسرائیل زخمیوں کو علاج کے لیے غزہ سے باہر سفر کی اجازت دے گا۔ اس مرحلے کے آغاز کے 7 روز بعد اسرائیل مصر کے ساتھ رفح کراسنگ کھول دے گا۔
پہلے مرحلے میں اسرائیلی فوج مصر کے ساتھ سرحد جسے فلاڈیلفی راہداری کہا جاتا ہے، سے پیچھے ہٹ جائے گی اور آئندہ مراحل میں اس علاقے سے واپس چلی جائے گی۔
غیر ملکی ذرائع ابلاغ کی جانب سے دعویٰ کیا گیا تھا کہ فلسطینی مزاحمتی تنظیم حماس اور اسرائیل غزہ جنگ بندی معاہدے پر متفق ہوگئے ہیں۔ جنگ بندی معاہدے پر اتفاق کے بعد 15 ماہ سے زائد عرصے سے جاری جنگ کے اختتام کی امید پیدا ہوگئی ہے۔
یاد رہے کہ فلسطینی مزاحمتی تنظیم حماس نے غزہ جنگ بندی معاہدے پر رضامندی ظاہر کی تھی۔
