بنکرز مسماری کا عمل جاری ہے

کرم میں پائیدار امن کیلئے بنکرز مسماری کا عمل جاری ہے، بیرسٹر ڈاکٹر سیف

ویب ڈیسک: خیبرپختونخوا کے مشیر اطلاعات بیرسٹر ڈاکٹر سیف سے کہا ہے کہ کرم میں پائیدار امن کیلئے بنکرز مسماری کا عمل جاری ہے۔
صوبائی مشیر اطلاعات و تعلقات عامہ بیرسٹر ڈاکٹر سیف سے اہلسنت و اہل تشیع وفود نے الگ الگ ملاقاتیں کیں، اس دوران فریقین نے امن معاہدے کے نفاذ میں حائل رکاوٹوں پر تبادلہ خیال کیا، اور مشیر اطلاعات کو اپنے تحفظات سے آگاہ کیا۔
صوبائی مشیر نے دونوں وفود کے تحفظات بغور سنیں اور انہیں دور کرنے کی یقین دہانی کرائی، جبکہ وفود نے کرم معاملے پر حکومت کو مکمل تعاون کی یقین دہانی کراتے ہوئے کرم میں قیام امن کے لئے حکومتی فیصلوں کا خیر مقدم کیا، اور کرم میں قیام امن کے لئے حکومتی کوششوں کو سراہا۔
بیرسٹر سیف سے ملاقات کے دوران فریقین نے کرم معاملے میں خصوصی دلچسپی پر ان کا خصوصی شکریہ ادا کیا۔
مشیر اطلاعات نے کہا کہ وزیراعلی خیبرپختونخوا کی قیادت میں صوبائی حکومت کرم معاملے میں انتہائی سنجیدہ ہے، کرم میں امن کا قیام دونوں فریق اور عوام کے تعاون کے بغیر ممکن نہیں، اس معاملے میں کرم کے عوام کو حکومت کا ساتھ دینا ہوگا۔
انہوں نے کہا کہ وزیراعلی سردار علی امین گنڈاپور نے ایک صدی سے زائد اس تنازعے کے پرامن حل میں خصوصی دلچسپی لی، کرم میں موجود دونوں فریقین اور عوام شر پسند عناصر سے دور رہیں۔
ان کاکہنا تھا کہ ضلع کرم میں پائیدار امن کی خاطر بنکرز مسماری کا عمل جاری ہے، دونوں فریقین کے بنکرز بلاتفریق مسمار کئے جا رہے ہیں، انہوں نے یقین دہانی کرائی کہ ضلع کرم کے لئے امدادی سامان کا بڑا قافلہ عنقریب روانہ کیا جائیگا۔

مزید پڑھیں:  آڈیو لیک کیس میں علی امین گنڈاپور کے وارنٹ گرفتاری برقرار