ویب ڈیسک: سپریم کورٹ میں 26 ویں آئینی ترمیم سے متعلق کیس سننے والا بنچ ٹوٹ گیا، کیس کی سماعت جسٹس منصور علی شاہ کی سربراہی میں تین رکنی بنچ نے کی۔
دوران سماعت جسٹس منصور علی شاہ نے ریمارکس دیئے کہ جسٹس عقیل عباسی سندھ ہائی کورٹ میں اس کیس کا فیصلہ کر چکے ہیں، آج کیس نہیں چل سکتا، پیر کو پہلے والا 3 رکنی بنچ ہی کیس کو سنے گا۔
جسٹس منصور علی شاہ نے مزید کہا کہ کیس کو چلانے کے لیے نیا بنچ بنانا پڑے گا، اس لئے پیر کو اسے سماعت کے لیے مقرر کر رہے ہیں، اس حوالے سے بتایا گیا ہے کہ جسٹس عرفان سعادت خان پہلے ہی بنچ میں شامل تھے۔
ان کا کہنا تھا کہ جائزہ لینا ہے کہ آرٹیکل 191 اے کے تحت ریگولر بنچز سے اختیار سماعت لیا جا سکتا ہے، جس پر ایڈیشنل اٹارنی جنرل نے استدعا کی کہ ہمیں تھوڑا وقت دیں۔ جسٹس عائشہ ملک نے کہا کہ کیس پیر کو فکس ہونے دیں پھر مہلت کو دیکھ لیں گے۔
بعد ازاں سپریم کورٹ نے اٹارنی جنرل آفس کو معاونت کا نوٹس جاری کر دیا اور 26 ویں آئینی ترمیم سے متعلق کیس کی سماعت پیر تک ملتوی کردی۔
