سیف علی خان شدید زخمی

گھر میں ڈکیتی واردات کے دوران سیف علی خان شدید زخمی

ویب ڈیسک: گھر میں ڈکیتی واردات کے دوران بالی ووڈ اداکار سیف علی خان شدید زخمی ہو گئے، جنہیں فوری طبی امداد کیلئَے لیلاوتی ہسپتال منتقل کر دیا گیا ہے۔
سیف علی خان اور کرینہ کپور کے گھر میں ڈکیتی کی واردات کے دوران مزاحمت پر اداکار شدید زخمی ہو گئے، جنہیں لیلاوتی ہسپتال منتقل کردیا گیا۔ واقعہ رات 2 بج کر 30 منٹ پر ممبئی میں باندرا میں پیش آیا۔
بھارتی ذرائع ابلاغ کے مطابق نامعلوم شخص نے چوری کی نیت سے سیف علی خان کے گھر میں داخل ہونے کی کوشش کی، اس موقع پر سیف علی خان نے مزاحمت کی تو ملزم انہیں زخمی کر کے فرار ہوگیا۔
ذرائع نے بتایا ہے کہ اداکار پر چاقو سے حملہ کیا گیا، جس سے وہ زخمی ہوگئے، جبکہ گھر والے محفوظ رہے، بالی ووڈ سٹار کی ہسپتال میں کامیاب سرجری کردی گئی ہے، ان کی صحت کے حوالے سے ہسپتال کے ڈاکٹر نیرج اُتمانی نے بتایا کہ سیف کو چاقو کے وار سے 6 زخم آئے، جن میں دو کافی گہرے تھے، جبکہ ایک زخم ریڑھ کی ہڈی کے نزدیک تھا۔
پولیس رپورٹ کے مطابق واقعہ کی تفتیش جاری ہے جبکہ گھر والوں کے بیانات بھی ریکارڈ کیے جارہے ہیں، دوسری جانب پولیس گھر میں لگے سی سی ٹی وی کیمروں سے ملزم کی شناخت کی کوشش کررہی ہے۔

مزید پڑھیں:  خیبر پختونخوا میڈیکل فیکلٹی کے امتحانی پرچے غائب، طلباء کے مستقبل پر سوالہ نشان