ویب ڈیسک: بانی پی ٹی آئی اور سابق وزیراعظم عمران خان نے کہا ہے کہ بیرسٹر گوہر کی آرمی چیف سے ملاقات خوش آئند ہے، اس میں پاکستان کے استحکام کی بات ہوگی۔
عمران خان نے بیرسٹر گوہر کی آرمی چیف سے ملاقات کی تصدیق کرتے ہوئے کہا کہ اگر کوئی بات چیت شروع ہوئی ہے تو یہ خوش آئند ہے یہ پاکستان کے لیے اچھا ہے، ہم چاہ رہے تھے مذاکرات ہوں، اس میں پاکستان کے استحکام کی بات ہوگی۔
اڈیالہ جیل کے کمرہ عدالت میں بانی پی ٹی آئی نے صحافیوں سے غیر رسمی گفتگو میں بیرسٹر گوہر اور آرمی چیف کی ملاقات کے حوالے سے صحافیوں کے سوال پر انہوں نے تردد کا اظہار کیا اور کہا کہ مجھے تفصیلات پتہ نہیں۔
اس کے فوری بعد عمران خان نے اس ملاقات کی تصدیق کرتے ہوئے کہا کہ بیرسٹر گوہر کی سربراہ پاک فوج سے ملاقات خوش آئند بات ہے، اگر کوئی بات چیت شروع ہوئی ہے تو یہ خوش آئند ہے، یہ پاکستان کے لیے نیگ شگون ہے، ہم بھی یہی چاہ رہے تھے کہ مذاکرات ہوں، اس میں پاکستان کے استحکام کی بات ہوگی۔
بانی پی ٹی آئی عمران خان نے بتایا کہ اسٹیبلشمنٹ کو ہم سے بات کرنی چاہیے، میں نے کبھی نہیں کہا کہ مذاکرات بند ہیں، ہمیشہ بات چیت کا کہا، دوسری طرف سے دروازے بند تھے، اب اگر بات چیت شروع ہوئی ہے تو پاکستان کے ہی استحکام کے لیے بات ہوگی، اس میں کوئی دو رائے ہو ہی نہیں سکتی۔
