القادرٹرسٹ کیس جعلی حکومت کا جعلی

القادرٹرسٹ کیس جعلی حکومت کا جعلی مقدمہ، امید ہے فیصلہ موخر نہیں ہوگا

ویب ڈیسک: خیبرپختونخوا کے مشیر اطلاعات بیرسٹر ڈاکٹر سیف نے کہا ہے کہ القادرٹرسٹ کیس جعلی حکومت کا جعلی مقدمہ ہے، امید ہے فیصلہ مزید موخر نہیں ہوگا، احتساب عدالت نے آج ساڑھے گیارہ بجے کیس کی سماعت اور فیصلہ سنانے کے حوالے سے تاریخ مقرر کی ہے۔
انہوں نے کہا ہے کہ تین بار فیصلہ مؤخر ہونے سے پہلے ہی اس حوالے سے شکوک و شبہات نے جنم لے لیا ہے، امید ہے کہ آج القادر کیس کا فیصلہ مزید مؤخر نہیں ہوگا، انصاف میں تاخیر، انصاف سے انکار کے مترادف ہے۔
مشیر اطلاعات نے کہا ہے کہ القادرٹرسٹ کیس جعلی حکومت کا جعلی مقدمہ ہے، اس کیس میں پیسہ بیرون ملک سے آیا اور اسے ریاست کے فلاحی منصوبے پر خرچ کیا گیا، جبکہ جعلی حکومت کی جانب سے اس کیس میں نوجوانوں کو سیرت النبی ﷺ سے روشناس کرانے پر عمران خان کو سزا دینے کی کوشش کی جا رہی ہے۔
بیرسٹر ڈاکٹر سیف کا کہنا تھا کہ اگر نوجوانوں کو سیرت النبی ﷺ سے روشناس کرانا جرم ہے، تو پھر یہ جرم عمران خان کرتا رہے گا، عمران خان یا بشریٰ بی بی کے اکاؤنٹ میں کوئی رقم منتقل نہیں ہوئی، ان کے خلاف تمام جعلی مقدمات کی حقیقت عدالتوں میں بے نقاب ہو رہی ہے۔
صوبائی مشیر اطلاعات کا کہنا تھا کہ جعلی حکومت نے ملک میں لاقانونیت کے نئے ریکارڈ قائم کیے ہیں، ان کی جانب سے بنایا جانے والا ہر مقدمہ آج عدالتوں میں بے نقاب ہو رہا ہے۔

مزید پڑھیں:  سونے کی قیمت میں ریکارڈ اضافہ، تولہ 3لاکھ سے تجاوز کر گیا