ویب ڈیسک: احستاب عدالت راولپنڈی کی جانب سے محفوظ فیصلہ میں بانی پی ٹی آئی اور سابق خاتون اول کو قید و جرمانے کی سزاوں پر تحریک انصاف کی جانب سے شدید ردعمل، پی ٹی آئی کا 190ملین پاؤنڈز کیس کا فیصلہ چیلنج کرنے کا اعلان، آج کا دن سیاہ دن قرار دیدیا گیا۔
تفصیلات کے مطابق بانی پی ٹی آئی عمران خان اور ان کی اہلیہ بشریٰ بی بی کیخلاف 190 ملین پاؤنڈز کیس کا فیصلہ پی ٹی آئی کی جانب سے ہائیکورٹ میں چیلنج کرنے کا اعلان کردیا گیا ہے۔
قومی اسمبلی میں قائد حزب اختلاف اور رہنما پی ٹی آئی عمر ایوب نے کہا ہے کہ 190 ملین پاؤنڈز کیس کے فیصلے کی شدید مذمت کرتے ہیں، اور اسے اعلیٰ عدالتوں میں چیلنج کریں گے۔ سوال تو نواز شریف کے بیٹے حسن نواز سے بھی پوچھا جانا چاہیے کہ لندن میں ون ہائیڈ پارک کی عمارت کس دولت سے خریدی؟
سینیٹر شبلی فراز نے کہا کہ آج ایک سیاہ دن ہے، احتساب عدالت کے فیصلے سے مایوسی ہوئی، فیصلے کی پرزور مذمت کرتے ہیں، انہوں نے کہا کہ اس دیس میں قانون ہے نہ آئین کی بالادستی، القادرٹرسٹ سےحکومت کو ایک دھیلے کا نقصان نہیں ہوا، اس کے باوجود یہ فیصلہ حیران کن ہے۔
شبلی فراز نے کہا کہ ملک کو لوٹنے والے آج معزز بنے بیٹھے ہیں، چور باہر پھر رہے ہیں جبکہ معصوم جیل میں ہیں، ہمارا لیڈر اور ہم ثابت قدم ہیں، ہم اس فیصلے کو دوسری عدالتوں میں لیکر جائیں گے۔
یاد رہے کہ پی ٹی آئی کا 190ملین پاؤنڈز کیس کا فیصلہ چیلنج کرنے کا اعلان اور اس فیصلہ کی شدید مذمت کی گئی ہے۔
