ویب ڈیسک: لاس اینجلس میں لگی آگ سے تباہ ہونیوالی عمارتوں کا ملبہ ہٹانے پر پابندی عائد کر دی گئی، خدشہ ظاہر کیا جا رہا ہے کہ ان عمارتوں کے ملبے میں خطرناک مواد موجود ہو سکتا ہے۔
تفصیلات کے مطابق امریکی ریاست کیلیفورنیا کے شہر لاس اینجلس میں لگی آگ سے تباہ ہونیوالی عمارتوں کا ملبہ ہٹانے پر پابندی عائد کردی گئی۔ یہ اقدام اس وقت تک برقرار رہے گا جب تک خطرناک مواد کی جانچ کرنے والا محکمہ اپنی تحقیقات مکمل نہیں کر لیتا۔
حکام نے اس حوالے سے بتایا ہے کہ عمارتوں کے ملبے، راکھ اور گرد میں ایسبیسٹوس، بھاری دھاتیں اور دیگر خطرناک مواد شامل ہو سکتا ہے۔ یہ خطرناک اجزا سانس کے ذریعے، جلد پر لگنے یا پانی میں شامل ہو کر جسم میں داخل ہو سکتے ہیں۔
حکام نے کہا ہے کہ ملبے کو نامناسب طریقے سے ٹھکانے لگانے سے ان خطرناک مادوں کے پھیلاؤ کا خطرہ پیدا ہوسکتا ہے، جس سے امدادی کارکنوں، رہائشیوں اور ماحول کو نقصان پہنچنے کا اندیشہ ہو۔
یاد رہے لاس اینجلس میں 7 جنوری سے لگی آگ پر تاحال قابو نہیں پایا جا سکا ہے۔ یہ آگ اب تک 37 ہزار ایکڑ سے زائد رقبے کو جلا کر راکھ کا ڈھیر بنا چکی ہے، اس کے نتیجے میں اب تک متعدد ہلاکتیں بھی ہو چکی ہیں۔
