خیبرپختونخوا میں بارش وبرفباری متوقع

خیبرپختونخوا میں بارش وبرفباری متوقع، احتیاطی تدابیر کا الرٹ جاری

ویب ڈیسک: خیبرپختونخوا میں بارش وبرفباری متوقع ہے، اسی وجہ سے پی ڈی ایم اے کی جانب سے احتیاطی تدابیر کا الرٹ جاری کر دیا گیا۔
محکمہ موسمیات کی جانب سے آج سے صوبہ کے بالائی اضلاع میں گرج چمک کے ساتھ بارش اور پہاڑوں پر شدید برفباری کا امکان ظاہر کیا گیا ہے، اور یہ سلسلہ 21 جنوری تک جاری رہنے کی پیشگوئی بھی کی گئی ہے۔
ذرائع کے مطابق خیبرپختونخوا کے مختلف اضلاع بشمول چترال، دیر، سوات، کوہستان، شانگلہ، بٹگرام، مانسہرہ، ایبٹ آباد، ہری پور، مالاکنڈ، بونیر، باجوڑ، مہمند، خیبر، اورکزئی، کرم، وزیرستان، پشاور، چارسدہ، نوشہرہ، صوابی، بنوں، کرک اور کوہاٹ وغیرہ میں وقفے وقفے سے بارش اور برفباری کا امکان ہے۔
پی ڈی ایم اے نے ضلعی انتظامیہ کو مراسلہ جاری کرتے ہوئے کسی بھی ناخوشگوار واقعے سے پیشگی نمٹنے کے لیے اقدامات کرنے کی ہدایت کر دی ہے۔ اس حوالے سے ضلعی انتظامیہ کو چھوٹی، بڑی ہر قسم مشینری کی دستیابی یقینی بنانے کا بھی حکم دیا گیا ہے۔
ذرائع ے بتایا ہے کہ خیبرپختونخوا میں بارش وبرفباری متوقع ہے، اس لئے بارش کے دوران بجلی کی تاروں، بوسیدہ عمارتوں، سائن بورڈز اور بل بورڈز سے عوام کو دور رہنے کی ہدایت کی گئی ہے۔ اس کے ساتھ ساتھ حساس بالائی علاقوں میں سیاحوں اور مقامی آبادی کو موسمی حالات سے باخبر رہنے اور احتیاطی تدابیر اپنانے کی بھی ہدایت کی گئی ہے۔
سیاحوں کے لیے پی ڈی ایم اے نے خصوصی ہدایات جاری کر دیں، اس حوالے سے سیاحوں کو تاکید کی گئی ہے کہ وہ موسمی حالات اور سڑکوں کی بندش کے پیش نظر سیاحتی مقامات کا رخ کرنے سے پہلے معلومات حاصل کریں، اور کسی بھی ہنگامی صورتحال میں پی ڈی ایم اے کی ہیلپ لائن پر رابطہ کرنے کی ہدایت بھی جاری کی گئی ہے۔

مزید پڑھیں:  عمران خان نے سندھ کی پارٹی قیادت تبدیل کرنے کی ہدایت دیدی