ویب ڈیسک: بانی پاکستان تحریک انصاف کے وکیل فیصل چوہدری نے اڈیالہ جیل کے باہر میڈیا سے گفتگو کرتے ہوئے کہا ہے کہ عمران خان نے پیغام دیا ہے کہ خیبرپختونخوا بھر سے قافلے 8فروری کو پشاور جمع ہونگے، اور شٹرڈاؤن کرینگے۔ فیصل چوہدری نے کہا ہے کہ عمران خان پرعزم اور حوصلے میں ہیں، سابق وزیر اعظم نے کہا ہے کہ وہ کسی پریشر کے آگے نہیں جھکیں گے، ان کا کہنا تھا کہ ہم جیلوں میں رہنے کو تیار ہیں، اصول اور نظریے کی خاطر ہمیشہ کھڑے رہیں گے۔
فیصل چوہدری نے مزید کہا کہ بانی پی ٹی آئی کا پیغام ہے کہ خیبرپختونخوا بھر سے قافلے 8فروری کو پشاور جمع ہونگے، اور شٹرڈاؤن کرینگے، بانی پی ٹی آئی نے کہا ہے کہ القادر ٹرسٹ نہ تو بلاول ہاؤس ہے اور نہ ایون فیلڈ ہاؤس، لیکن کل القادر یونیورسٹی کے کیمپس سے طالب علموں کو نکالا گیا جس کی پرزور مذمت کرتا ہوں۔
فیصل چوہدری نے کہا کہ سابق وزیراعظم کا پیغام ہے کہ ہم جیلوں میں رہنے کو تیار ہیں، اصول اور نظریے کی خاطر ہمیشہ کھڑے رہیں گے، اور کسی کے آگے نہیں جھکیں گے۔ انہوں نے مزید کہا کہ 9 مئی ہو یا 26 نومبر ہم جوڈیشل کمیشن کا مطالبہ کر رہے ہیں، چیٹرز کبھی بھی نیوٹرل امپائرزکے ساتھ نہیں کھیلتے، جبکہ ہم آج بھی نیوٹرل امپائرزکے ساتھ کھیلنا چاہتے ہیں۔
وکیل فیصل چوہدری نے کہا کہ عمران خان کا کہنا تھا کہ بشریٰ بی بی گھریلو خاتون ہیں، انہوں نے میرا ساتھ دینے کے لیے صعوبتیں برداشت کیں، اخلاقی گراوٹ آچکی ہے کہ آپ خواتین کو بھی ان معاملات میں نہیں بخشتے، حالانکہ بشریٰ بی بی ایک گھریلو خاتون ہیں، سیاست سے ان کا کچھ لینا دینا نہیں۔
یاد رہے کہ گزشتہ روز بانی پی ٹی آئی عمران خان کو القادر ٹرسٹ کے کیس میں 14 سال اور ان کی اہلیہ بشری بی بی کو 7 سال قید کی سزا سنا چکی ہے.
