عمران خان کو کرپشن

عمران خان کو کرپشن و منی لانڈرنگ پر نہیں ،فلاحی منصوبے پر سزا دی گئی: بیرسٹر سیف

ویب ڈیسک: مشیر اطلاعات خیبرپختونخوا بیرسٹر محمد علی سیف نے کہا ہے کہ عمران خان کو کرپشن اور منی لانڈرنگ پر نہیں بلکہ فلاحی منصوبے پر سزا دی گئی ہے ۔
وزیراعلیٰ پنجاب مریم نواز کے بیان پر ردعمل دیتے ہوئے صوبائی مشیر اطلاعات خیبر پختونخوا بیرسٹر سیف کا کہنا تھا کہ سابق وزیراعظم عمران خان کو شریف خاندان کی طرح کرپشن اور منی لانڈرنگ جیسے دھندوں پر سزا نہیں سنائی گئی ۔
بیرسٹر ڈاکٹر سیف کا کہنا تھا کہ بانی پی ٹی آئی تاریخ کے واحد وزیراعظم ہیں جنہیں فلاحی منصوبے پر سزا دی گئی، شریف خاندان کی طرح پیسہ بیرون ملک منتقل کرنے پر سزا نہیں ہوئی۔
انہوں نے کہا کہ القادر کیس میں پیسہ بیرون ملک نہیں گیا بلکہ پاکستان آیا، القادر یونیورسٹی میں سیرت النبی کی تعلیمات دی جاتی ہیں، اگر سیرت النبی کی تعلیمات کو فروغ دینا جرم ہے تو ہمیں اس جرم پر فخر ہے۔
رہنما پی ٹی آئی کا کہنا تھا کہ بانی پی ٹی آئی کو کرپشن اور منی لانڈرنگ جیسے دھندوں پر سزا نہیں ہوئی، سزا پر خوشیاں منانے والے جلد ہی پچھتائیں گے، مریم نواز کو القادر یونیورسٹی ضبط ہونے اور اس کے تحویل میں آنے پر بہت خوشی ہے۔

مزید پڑھیں:  امریکی جج نے ٹرمپ کو یو ایس ایڈ کو مکمل ختم کرنے سے روک دیا