ویب ڈیسک: بلوچستان کے مختلف علاقوں میں شدید بارش اور برفباری کے بعد سردی کی شدت بڑھ گئی جبکہ نشیبی علاقے زیر آب گئے ۔
کوئٹہ، چمن، درہ کوژک، قلعہ عبداللہ اور زیارت سمیت کئی مقامات پر برفباری اور بارش ہوئی، زیارت شہر میں رات سے اب تک 3 انچ برف پڑچکی ہے، این 25 چمن کوئٹہ کراچی شاہراہ پر ایمرجنسی نافذ کر دی گئی ہے۔
بارش اور برفباری سے شمالی بلوچستان کے بیشتر علاقوں میں بجلی کا بریک ڈائون ہوگیا،برفانی طوفان کے باعث کوژک ٹاپ میں روڈ کلیئرنس آپریشن بھی معطل ہوگیا ہے۔
بلوچستان، پنجاب اور خیبرپختونخوا کیلئے آمدورفت معطل ہوکر رہ گئی اور کئی گاڑیاں پھنس کر رہ گئیں۔
محکمہ موسمیات کے مطابق بارش اور برفباری کا سلسلہ کل تک جاری رہے گا، کئی شہروں میں فلیش فلڈنگ کا خدشہ بھی ہے۔
دوسری جانب محکمہ موسمیات کا کہنا ہے کہ اسلام آباد، مری اور گلیات میں بھی بادل برسنے کا امکان ہے، پشاور، چترال، دیر، سوات میں بھی بارش متوقع ہے۔
ملک کے بیشتر علاقوں میں موسم آج بھی سرد اور خشک رہے گا، کراچی میں بھی ٹھنڈی ہوائیں سپیڈ پکڑ گئی ہیں۔
