ویب ڈیسک: وزیراعلیٰ خیبر پختونخوا سردار علی امین گنڈاپور نے کہا ہے کہ عدلیہ اور میڈیا کی آزادی کیلئے جدوجہد جاری رہے گی، شہریوں کے حقوق کا ہر حال میں تحفظ کیا جائے گا۔
انہوں نے کہا کہ پاکستان تحریک انصآف کے بانی اور سابق وزیراعظم عمران خان اور ان کی اہلیہ بشریٰ بی بی غیر قانونی سزا کے باوجود قانون پر یقین رکھتے ہیں، اور تمام تر مصائب و مشکلات کے باوجود عدلیہ اور میڈیا کی آزادی کیلئے جدوجہد جاری رہے گی۔
علی امین گنڈاپور نے اس حوالے سے مزید بتایا کہ بانی پی ٹی آئی کو سوائے اللہ کی ذات کے کسی چیز کا خوف نہیں، پاکستان تحریک انصاف کی جدوجہد کا مقصد جمہوریت کی سربلندی اور آئین وقانون کی حکمرانی ہے، اور یہ جدوجہد اہداف کے حصول تک جاری رہے گی۔
ان کا کہنا تھا کہ آزاد عدلیہ و میڈیا کیلئے جدوجہد جاری ہے اور تمام تر مشکلات کے باوجود جاری رہے گی، اس کے ساتھ ساتھ شہریوں کے بنیادی حقوق کا تحفظ یقینی بنا رہے ہیں۔
وزیراعلیٰ خیبرپختونخوا کا مزید کہنا تھا کہ اصولوں اور نظریات پر سمجھوتہ قطعی نہیں کیا جائَے گا، اصولوں و نظریات پر سمجھوتہ وہ لوگ کرتے ہیں جو خوف کے سائے تلے رہتے ہیں، جبکہ بانی پی ٹی آئی اور سابق وزیراعظم عمران خان کے ہمراہ ہماری کوششیں آخری سانس تک جاری رہیں گی۔
