ویب ڈیسک: پاکستان تحریک انصاف کے تحریری مطالبات کا جواب تیار، حکومتی مذاکراتی کمیٹی کا 9مئی پر جوڈیشل کمیشن بنانے سے انکار، معاملات مزید الجھ گئے۔
تفصیلات کے مطابق حکومتی مذاکراتی کمیٹی نے پی ٹی آئی کے تحریری مطالبات کے جواب تیار کرتے ہوئے سانحہ 9مئی پر جوڈیشل کمیشن بنانے سے انکار کر دیا ہے۔ پی ٹی آئی کے مطالبات پر حکومت کے تحریری جواب میں کہا گیا ہے کہ 9 مئی کے واقعات پر جوڈیشل کمیشن نہیں بن سکتا۔
تحریری حکومتی جواب میں مزید کہا گیا ہے کہ جوڈیشل کمیشن ان معاملات پر بنتا ہے جو عدالت میں زیر بحث نہ ہوں، 9 مئی مقدمات تو عدالتوں میں ہیں، جبکہ اس حوالے سے بعض ملزمان کو ملٹری کورٹس سے سزائیں بھی سنائی جا چکی ہیں۔
ذرائع کے مطابق حکومت کی جانب سے پی ٹی آئی سے کہا گیا ہے کہ 26 نومبر سے متعلق لاپتہ افراد کی فہرست اور گرفتار افراد کی تفصیلات فراہم کی جائیں، گرفتار افراد کے نام، کیونکہ تفصیلات میسر نہ ہونے تک رہائی کے لیے کیسے کوئی اقدام کیا جا سکتا ہے؟۔
حکومتی جواب میں مزید کہا گیا ہے کہ تحریک انصآف کی جانب سے پیش کردہ تحریری مطالبات میں دعویٰ کیا گیا ہے کہ 26 نومبر کو ہلاکتیں ہوئی ہیں، اس سلسلے میں بھی تفصیلات فراہم کی جائیں۔
ذرائع کے مطابق حکومتی مذاکراتی کمیٹی آئندہ چند دنوں میں سپیکر قومی اسمبلی کو اپنے تحریری جواب پیش کر دے گی، اس کے بعد مذاکرات کے چوتھے اجلاس کا فیصلہ سپیکر کا جواب موصول ہونے پر کیا جائے گا۔ یاد رہے کہ حکومتی مذاکراتی کمیٹی کا 9مئی پر جوڈیشل کمیشن بنانے سے انکار مسائل مزید الجھانے کا باعث بھی بن سکتا ہے۔
