ویب ڈیسک: اسلام آباد ہائی کورٹ کی جانب سے پاکستان تحریک انصآف کے بانی عمران خان کی درخواست پر نوٹس جاری کرتے ہوئے اڈیالہ جیل حکام ذاتی حیثیت میں طلب کر لیا۔
تفصیلات کے مطابق اسلام آباد ہائی کورٹ نے بانی پی ٹی آئی اور سابق وزیراعظم عمران خان کی درخواست پر فریقین کو نوٹس جاری کرتے ہوئے اڈیالہ جیل حکام ذاتی حیثیت میں طلب کر لئے۔
اسلام آباد ہائیکورٹ کے چیف جسٹس عامر فاروق نے عمران خان کی اخبار، ٹی وی کی سہولت بحالی، بیٹوں سے ٹیلیفونک گفتگو اور ذاتی معالج سے چیک اپ کے لئے دائر کردہ درخواست پر سماعت کی۔
دوران سماعت بانی پی ٹی آئی کے وکیل فیصل چودھری عدالت میں پیش ہوئے اور دلائل دیتے ہوئے مؤقف اپنایا کہ عمران خان کی جانب سے متفرق درخواست فائل کی ہے، جس میں کہا گیا ہے کہ عمران خان کی ہفتہ وار بیٹوں سے بات کرائی جائے، اخبارات فراہم کئے جائیں اور ذاتی معالج کی اجازت دی جائے۔
انہوں نے استدلال کیا کہ ٹرائل کورٹ نے ذاتی معالج سے متعلق کچھ نہیں لکھا، اس لئے 10 جنوری 2025 کا آرڈر چیلنج کیا ہے۔ دوران سماعت عدالت نے فریقین کو جواب کیلئے نوٹس جاری کر دیئے، عدالت نے ہدایت کی کہ جیل نمائندہ آئندہ سماعت پر ذاتی حیثیت میں پیش ہو، اس کے ساتھ ہی سماعت 23 جنوری تک ملتوی کر دی گئی۔
