ویب ڈیسک: ضلع لوئر کرم میںبگن کے قریب قافلے پر حملے میں ملوث شرپسندوں کی نشاندہی کر لی گئی ہے اس حوالے سے سرچ آپریشن جاری ہے.
تفصیلات کے مطابق لوئر کرم میں بگن کے قریب قافلے پر حملے میں ملوث شرپسندوں کی نشاندہی کر لی گئی ہے، اس حوالے سے سرکاری ذرائع کا کہنا ہے کہ شر پسندوں کی تلاش کے لئے ضلعی انتظامیہ اور پولیس کی زیر نگرانی سرچ آپریشن جاری ہے، جبکہ اس دوران سیکورٹی فورسز بھی کسی بھی موقع پر مقامی پولیس و دیگر فورسز کی سپورٹ کے لئے موجود ہیں .
سرکاری ذرائع کے مطابق اب تک 19 شر پسندوں کی نشاندہی کرنے کے بعد ان کے خلاف ایف آئی آر درج کر لی گئی ہیں، جبکہ اس کارروائی کے دوران لوئر کرم میں بگن اور گرد و نواح کے علاقوں کو خالی کروا لیا گیا ہے ، امن معائدے کے مطابق پورے کرم سے مرحلہ وار ہتھیار جمع کیے جائیں گے ، اور تمام بنکرز بھی مسمار کئے جائیںگے .
سرکاری ذرائع کاکہنا ہے کہ ریاست نے کُرم میں شر پسندوں کے خلاف بلا تفریق سخت کاروائی کا فیصلہ کر لیا ہے جن سے آہنی ہاتھوں سے نمٹا جائے گا .
