ویب ڈیسک: آرمی چیف اور تحریک انصاف رہنماؤں کی بلاشیڈول ملاقات پر وزیراعظم کو بریفنگ دیدی گئی۔
تفصیلات کے مطابق حکومتی ذرائع کی جانب سے دعویٰ کیا گیا ہے کہ آرمی چیف اور تحریک انصاف رہنماؤں کی بلاشیڈول ملاقات کے حوالے سے وزیراعظم کو بریف کردیا گیا ہے۔ اس ملاقات میں آرمی چیف نے پی ٹی آئی رہنماؤں سے ان کے پارٹی مسائل سنے اور پھر ان معاملات میں نہ پڑنے کا کہہ کر مشورہ دیا کہ وہ سیاسی معاملات پر حکومت سے بات کریں۔
یاد رہے چند دن قبل آرمی چیف اور چیئرمین پی ٹی آئی بیرسٹر گوہر کے درمیان ملاقات کی خبر سامنے آئی تھی جس کے بعد ابتداء میں بیرسٹر گوہر نے ملاقات کی تردید کی مگر بعد ازاں بانی پی ٹی آئی عمران خان کی جانب سے ملاقات کی تصدیق کیے جانے کے بعد بیرسٹر گوہر نے بھی ملاقات کا اعتراف کر لیا تھا۔
