ویب ڈیسک: امریکہ کے نومنتخب صدر ڈونلڈ ٹرمپ کا سیاسی مخالفین سے انتقام ختم کرنے کا اعلان، امریکا بہت جلد مضبوط، عظیم اور پہلے سے کہیں زیادہ کامیاب ملک بنے گا۔
تفصیلات کے مطابق امریکی صدر ڈونلڈ ٹرمپ نے حلف اٹھاتے ہی سیاسی مخالفین سے انتقام ختم کرنے کا اعلان کر دیا۔ حلف اٹھانے کے بعد اپنے افتتاحی خطاب میں ان کا کہنا تھا کہ اب امریکا ترقی کرے گا۔ انہوں نے پرعزم انداز میں کہا کہ اپنے دور میں امریکا کو پہلے رکھوں گا، امریکا بہت جلد مضبوط، عظیم اور پہلے سے کہیں زیادہ کامیاب ملک بنےگا۔ میری اولین ترجیح ایک ایسا ملک قائم کرنا ہے جو آزاد اور مضبوط ہو۔
ڈونلڈ ٹرمپ نے کہا کہ 8 سال مجھے جن مشکلات کا سامنا رہا، امریکی تاریخ میں کسی اور کے ساتھ ایسا نہیں ہوا، میں امریکا کو پھر سے عظیم بناؤں گا۔ اس موقع پر ٹرمپ نے ملک بھر سے حکومتی سنسرشپ ختم کرنے کا بھی اعلان کیا۔
انہوں نے کہا کہ رنگ اور نسل کی بنیاد پر امتیاز ختم کر دیں گے، امریکا میں آزاد اظہار رائے کی مکمل آزادی بحال کروں گا۔ امریکی سرزمین کے نیچے موجود تیل و گیس کے ذخائر نکالنا شروع کریں گے، امریکا دنیا میں تیل و گیس پیدا کرنے والا سب سے بڑا ملک بن جائے گا۔
