پشاور زلمی اور کویت کرکٹ

پشاور زلمی اور کویت کرکٹ میں ایکسچینج پروگرام کاآغاز، ایم او یو سائن

ویب ڈیسک: پشاور زلمی اور کویت کرکٹ میں ایکسچینج پروگرام کاآغاز ہو گیا، اس حوالے سے ایم او یو پر دستخط ہو گئے ہیں۔
تفصیلات کے مطابق روزنامہ مشرق کی ریجنل پارٹنر اور پاکستان سپر لیگ کی فرنچائز پشاور زلمی اور کویت کرکٹ کے درمیان ایم او یو پر دستخط ہو گئے ہیں، جس کے تحت دونوں ٹیموں کے مابین ایکسچینج پروگرام شروع ہو گیا ہے۔ اس پروگرام کے تحت پاکستانی پلیئرز بھی کویت کی ٹیم کی نمائندگی کریں گے۔
پشاور زلمی کے چیئرمین جاوید افریدی نے ایک بار پھرعزم ظاہر کرتے ہوئے کہا ہے کہ خیبر پختون خوا کے نوجوان کرکٹرز کو اپنی صلاحیتوں کے اظہار کا موقع اور ان کیلئے ہر ممکن سہولیات فراہم کرتے رہیں‌گے۔ دونوں فریقین کے مابین حیات اباد سپورٹس کمپلیکس میں زلمی کے چیف آپریٹنگ افیسر میاں عباس لائق اور ڈی جی کویت کرکٹ ساجد اشرف نے معاہدے پر دستخط کیے، اس موقع پر سابق کپتان محمد یوسف، پشاور زلمی کے ڈائریکٹر کرکٹ محمد اکرم بھی موجود تھے۔
ایم او یو کے تحت دونوں‌ٹیموں کے درمیان ایکسچینج پروگرام شروع ہو گیا ہے، اس معاہدے کے تحت پشاور میں ہونے والے پشاور زلمی کے ٹیلنٹ ہنٹ اور ٹرائلز سے کویت کرکٹ ٹیم کیلئے کھلاڑیوں کا چناؤ بھی کیا گیا۔ پشاور زلمی کے رواں ماہ ہونے والے ٹرائلز کے شارٹ لسٹ 100 کرکٹرز کویت کرکٹ ٹیم کے لیے ہونے والے ٹرائلز میں شریک ہوئے، 3 دن جاری رہنے والے ٹرائلز میں پشاور زلمی اور کویت کرکٹ کی کوچز نے کھلاڑیوں کی کارکردگی کا جائزہ لیا۔
اس موقع پر ڈی جی کویت کرکٹ ساجد اشرف کا کہنا تھا کہ وہ پشاور زلمی کا شکریہ ادا کرتے ہیں جنہوں نے ٹیلنٹ ہنٹ میں کویت کرکٹ ٹیم کے لیے کھلاڑیوں کے انتخاب میں مدد کی۔ ایکسچینج پروگرام سے نہ صرف خیبر پختون خوا اور پاکستان کے کرکٹرز کو صلاحیتوں کے اظہار کا موقع ملے گا بلکہ دونوں ملکوں کے درمیان برادرانہ تعلقات بھی مزید مضبوط ہوں گے۔
پشاور زلمی کے ڈائریکٹر کرکٹ محمد اکرم نے کہا کہ پشاور زلمی کے ٹیلنٹ ہٹ میں شریک بہترین کرکٹرز کو کویت کرکٹ ٹیم میں موقع ملنا خوش آئند ہے۔
چیئرمین پشاور زلمی جاوید افریدی کا اس حوالے سے کہنا تھا کہ پشاور زلمی کی پہلے دن سے کوشش رہی ہے کہ وہ خیبر پختون خوا کے نوجوان کرکٹرز کو نہ صرف صلاحیتوں کے اظہار کا موقع فراہم کرے بلکہ انہیں ہر ممکن سہولیات جن میں کرکٹ کا سامان، کٹ بیگ وغیرہ شامل ہیں، فراہم کرے۔
انہوں نے کہا کہ کویت کی قومی ٹیم کے لیے پشاور زلمی کے ٹرائلز سے منتخب ہونے والے کھلاڑیوں کا اعلان ائندہ چند دنوں میں کیا جائے گا۔

مزید پڑھیں:  8 فروری صوابی جلسہ ، پی ٹی آئی صوبائی صدر کی وزیراعلی سے ملاقات