خیبر پختونخوا پولیس لازوال قربانیاں

خیبر پختونخوا پولیس نے امن کی خاطر لازوال قربانیاں دیں،وزیراعلیٰ

ویب ڈیسک: وزیراعلیٰ خیبر پختونخوا علی امین گنڈا پور نے کہا ہے کہ خیبر پختونخوا پولیس نے امن کی خاطر لازوال قربانیاں دیں ، صوبے کے عوام کو ان قربانیوں پر فخر ہے ۔
تفصیلات کے مطابق وزیراعلیٰ خیبر پختونخوا علی امین خان گنڈاپور نے پولیس ٹریننگ سکول ڈیرہ اسماعیل خان کا دورہ کیا اس موقع پر پولیس کے چاق و چوبند دستے کی جانب سے گارڈ آف انر پیش کیا گیا ۔
وزیر اعلیٰ نے ڈیرہ اسماعیل خان میں نو قائم شدہ پولیس ٹریننگ سکول کا افتتاح کیا ،پولیس ٹریننگ سکول کے مختلف سیکشنز کا دورہ بھی کیا جبکہ وزیر اعلیٰ نے پولیس ٹریننگ سکول میں زیر تربیت ریکروٹس کی موک ایکسرسائز کا معائنہ بھی کیا ۔
اس موقع پر وزیراعلیٰ کو بریفنگ کے دوران بتایا گیا کہ پولیس ٹریننگ سکول دو کروڑ روپے سے زائد کی لاگت سے قائم کیا گیا ہے جس میں کمپیوٹر لیب، کلاس رومز ،میس، رہائشی کوارٹرز اور دیگر درکار سہولیات دستیاب ہیں ۔
بریفنگ میں مزید بتایا گیا کہ نو قائم شدہ ٹریننگ سکول میں فی الوقت 100 ریکروٹس کی ٹریننگ کی گنجائش موجود ہے جسے بعد میں 500تک توسیع دی جائے گی ٹریننگ سکول میں لیڈیز پولیس کی ٹریننگ بھی کرائی جائے گی، نو قائم شدہ ٹریننگ سکول میں 100ریکروٹس پر مشتمل پہلے بیچ کی ٹریننگ بھی جاری ہے۔
مزید کہا گیا کہ ٹریننگ سکول کا کل رقبہ 452 کنال ہے جس میں سے 100 کنال کورڈ ایریا ہے، نو قائم شدہ پولیس ٹریننگ سکول سے ڈیرہ اسماعیل خان اور ملحقہ اضلاع کے لوگ بھی مستفید ہونگے، پولیس ٹریننگ سکول میں ایڈوانس ٹریننگ کے لیے ٹیکٹس سکول کے قیام کا منصوبہ بھی زیر غور ہے۔
اس موقع پر خطاب کرتے ہوئے وزیراعلیٰ خیبر پختونخوا علی امین گنڈا پور نے کہا کہ اپنی سرحدوں کا تحفظ یقینی بنانے کے لئے غازیوں اور شہدا کی قربانیوں کو سلام پیش کرتا ہوں ، صوبے میں امن و امان کے لئے خیبر پختونخوا پولیس نے لازوال قربانیاں دی ہیں،صوبے کے عوام کو پولیس کی ان قربانیوں پر فخر ہے۔
انہوں نے کہا کہ ہم صوبے میں پولیس فورس کو مضبوط اور مستحکم بنانے ہر بھرپور وسائل خرچ کر رہے ہیں ، پولیس فورس کو حالات سے موثر انداز میں نمٹنے کے قابل بنانے کے لیے جدید اسلحہ اور بلٹ پروف گاڑیاں فراہم کر رہے ہیں۔
وزیراعلیٰ کا مزید کہنا تھا کہ ہمارے نوجوانوں کے پاس جذبہ موجود ہے انہیں جدید اسلحہ اور آلات ترجیحی بنیادوں پر فراہم کریں گے پولیس شہدا کے بچوں کی بھرتی کے لیے تمام کوٹہ دے دیا ہے، پولیس اہلکاروں کی پروموشن میں کوئی رکاوٹ نہیں ہوگی۔
انہوں نے کہا کہ صوبے میں موجود پولیس ٹریننگ سکولوں کو مزید بہتر بنا رہے ہیں ، ٹریننگ کے معیار کو بہتر بناکر 9 ماہ کا دورانیہ کم کر کے 90 دن پر لائیں گے ۔
اس موقع پر وزیراعلیٰ علی امین گنڈا پور کی جانب سے پولیس ٹریننگ سکول ڈی آئی خان میں فائرنگ رینج کی تعمیر کا بھی اعلان کیا گیا ۔

مزید پڑھیں:  ڈونلڈ ٹرمپ کی دھمکی کو سنجیدگی سے لینا چاہئے ، جسٹس ٹروڈو