ویب ڈیسک: لوئر کرم میں شر پسندوں کے خلاف آپریشن تیسرے روز بھی جاری رہا اس دوران ہیلی کاپٹروں سے شیلنگ بھی کی گئی ۔
تفصیلات کے مطابق لوئر کرم کے علاقے بگن اورمضافات میں شرپسندوں کیخلاف کارروائیوں کا سلسلہ تیسرے بھی جاری رہا ، آپریشن کے دوران بگن اورمضافات میں ہیلی کاپٹرزکا بھی استعمال کیاجارہاہے۔
ضلعی انتظامیہ کے مطابق بگن اورمضافات میں ہیلی کاپٹروں سے شر پسندوں کے ٹھکانوں پر شیلنگ کی گئی جبکہ بگن جانے والے راستوں پر پولیس اورسکیورٹی فورسز کے دستے تعینات ہیں۔
آپریشن کے دوران سکیورٹی فورسز کی جانب سے اسلحہ جمع کرانے کے اعلانات کیے جارہے ہیں اور کہا جا رہا ہے کہ مکین اپنا اسلحہ جمع کرادیں جبکہ اسلحہ جمع کرانے سے متعلق قبائلی عمائدین کا جرگہ بھی جاری ہے۔
اس حوالے سے کمشنر کوہاٹ کا کہنا تھاکہ کرم میں کارروائیاں مقامی افرادکیخلاف نہیں، شرپسندوں کے خلاف کی جارہی ہے۔
دوسری جانب کرم متاثرین کے حوالے سے ڈپٹی کمشنر ہنگو گوہر زمان وزیر کا کہنا تھاکہ کرم سے ابھی تک کوئی متاثرین کیپموں میں نہیں آئے ہیں، ٹل انٹری پوائنٹ پرعملہ موجود اور تمام محکمے الرٹ ہیں۔
ان کا کہنا تھاکہ محمد خواجہ کے مقام پرکیمپ قائم کرنے کیلئے جگہ مختص کی ہے، ٹل میں 3 سرکاری عمارتیں بھی مختص کی گئیں ہیں تاہم کرم سے آئے 20کے قریب خاندان رشتہ داروں کے پاس چلے گئے ہیں۔
