ویب ڈیسک: رواں سال بارشیں نہ ہونے کے باعث ملک میں خشک سالی کے خطرات منڈلانے لگے ۔
تفصیلات کے مطابق محکمہ موسمیات نے رواں سال ملک میں بارشیں کم ہونے کی وجہ سے خشک سالی کے خطرے کے پیش نظر ایڈوائزری جاری کردی ۔
محکمہ موسمیات کے مطابق ملک کے میدانی علاقوں میں خاطر خواہ بارشیں نہیں ہوئیں، یکم ستمبر 2024 سے 15جنوری 2025 تک ملک بھر میں 40فیصد کم بارشیں ہوئیں۔
اسی طرح سندھ میں 52 فیصد ،بلوجستان میں 45 فیصد کم بارشیں ریکارڈ کی گئیں جبکہ پنجاب میں 42 فیصد کم بارش ریکارڈ کی گئی ۔
پنجاب میں اٹک، چکوال، اسلام آباد، راولپنڈی ، لیہ ،ملتان ،راجن پور، بہاولپور، فیصل آباد میں بھی خشک سالی کے خطرات منڈلانے لگے۔
موسم کا احوال بتانے والوں کا کہنا تھا کہ سندھ کے اضلاع کراچی ،بدین، جیکب آباد سمیت کئی علاقے خشک سالی کا شکار ہیں جبکہ بلوجستان میں لسبیلہ، پنجگور، خیرپور، دالبدین سمیت ملحقہ علاقوں میں کم بارشیں ریکارڈ ہوئی ہیں۔
علاوہ ازیں آنے والے دنوں میں پنجاب، سندھ، بلوچستان میں معمول سے کم بارشوں کی پیشگوئی کم بارشوں کے باعث آنے والے دنوں میں درجہ حرارت میں اضافے کا امکان ہے۔
