اسرائیلی فوجی سربراہ ہزری ہلیوی مستعفی

حماس حملے روکنے میں ناکامی پر اسرائیلی فوجی سربراہ ہزری ہلیوی مستعفی

ویب ڈیسک: 7 اکتوبر 2023 کو حماس کے حملے روکنے میں ناکامی پر اسرائیلی فوجی سربراہ ہزری ہلیوی مستعفی ، انہوں نے کہا ہے کہ 6 مارچ کو عہدہ سے الگ ہو جائیں گے۔
تفصیلات کے مطابق فلسطین کی مزاحمتی تنظیم حماس کے 7 اکتوبر 2023 کے حملے روکنے میں ناکامی پر اسرائیلی فوج کے سربراہ لیفٹیننٹ جنرل ہرزی ہلیوی نے اپنے عہدے سے مستعفیٰ ہونے کا اعلان کر دیا۔ اسرائیلی فوج کے چیف آف سٹاف لیفٹیننٹ کا کہنا ہے کہ وہ حماس حملے روکنے میں ناکامی پر 6 مارچ کو مستعفیٰ ہوجائیں گے۔
اسرائیلی فوجی ذرائع کے مطابق ہلیوی نے اسرائیل کے وزیر اعظم اور وزیر دفاع کو لکھے گئے خط میں مخاطب کرتے ہوئے کہا ہے کہ اسرائیلی ڈیفنس فورسز کی 7 اکتوبر کی ناکامی کی ذمہ داری کے نتیجے میں، میں 6 مارچ 2025 کو اپنی مدت ختم کرنا چاہتا ہوں۔
لیفٹیننٹ جنرل ہرزی ہلیوی نے خط میں مزید لکھا ہے کہ 7 اکتوبر کی صبح میری کمانڈ میں اسرائیلی ڈیفنس فورسز اسرائیل کے شہریوں کو تحفظ فراہم کرنے میں ناکام رہی اور پھر اسرائیل نے بھاری اور دردناک قیمت چکائی۔ اس پر اسرائیلی وزیر دفاع نے ہلیوی کو 30 جنوری تک تحقیقات مکمل کرنے کی مہلت دی تھی تاکہ حماس کے 7 اکتوبر 2023 کے حملے کو روکنے میں ناکامی کی وجوہات معلوم کی جا سکیں۔
اسرائیلی وزیر اعظم کے دفتر سے جاری ہونے والے ایک بیان میں کہا گیا ہے کہ نیتن یاہو نے ہلیوی سے بات کی اور آئی ڈی ایف کی طویل خدمات اور قیادت پر چیف آف سٹاف کا شکریہ ادا کیا۔ یاد رہے اسرائیلی فوجی سربراہ ہزری ہلیوی مستعفی ہونے کا معاملہ جنگ بندی معاہدے کے چند دن بعد سامنے آیا۔
اس کے برعکس عرب میڈیا میں یہ خبریں زیر گردش ہیں کہ اسرائیلی آرمی چیف کی مدت ملازمت مارچ میں ہی ختم ہو رہی ہے، اس لئے ان کا حماس حملے روکنے میں ناکامی پر استعفیٰ ہوا میں تیز چلانے کے مترادف ہے۔ حماس کے حملے روکنے میں ناکامی پر اسرائیل کی سدرن کمان کے کمانڈنگ آفیسر میجر جنرل یارون فنکل مین نے بھی استعفیٰ دیا ہے۔

مزید پڑھیں:  پاکستان6ماہ میں آئی ایم ایف کی بڑی شرائط پوری کرنےمیں کامیاب