کرم میں غیرقانونی بنکرز مسماری

کرم میں غیرقانونی بنکرز مسماری کا سلسلہ دوبارہ شروع، پولیس تعیناتی کا فیصلہ

ویب ڈیسک: ضلع کرم میں غیرقانونی بنکرز مسماری کا سلسلہ دوبارہ شروع، پولیس کی اضافی نفری کی تعیناتی اور بیرسٹر ڈاکٹر سیف کی سربراہی میں مانیٹرنگ کمیٹی فعال کرنے کا فیصلہ کیا گیا۔
تفصیلات کے مطابق وزیر اعلی خیبر پختونخوا سردار علی امین گنڈاپور کی زیر صدارت کرم کے معاملے پر اہم اجلاس منعقد ہوا، جس میں چیف سیکرٹری، آئی جی پی، ایڈیشنل چیف سیکرٹری داخلہ اور دیگر متعلقہ حکام نے شرکت کی۔ اجلاس میں کرم کی تازہ صورتحال کا جائزہ لیا گیا اور اس سلسلے میں اہم فیصلے کئے گئے۔
اجلاس میں ضلع کرم میں غیرقانونی بنکرز مسماری کا سلسلہ دوبارہ شروع کرنے کا فیصلہ کیا گیا اور کہا گیا کہ آج سے بنکرز مسمار کرنے کا سلسلہ شروع ہوگا جبکہ علاقے میں پولیس کی اضافی نفری بھی تعینات کی جائَے گی۔
اجلاس میں فیصلہ کیا گیا کہ رواں مہینے کے آخر تک کرم کے لئے ضروری اشیاء پر مشتمل گاڑیوں کے چار قافلے بھیجے جائیں گے، کرم امن معاہدے کے دستخط کنندگان کا جرگہ بھی بلایا جائے گا، جرگے میں معاہدے پر عملدرآمد کے سلسلے میں دستخط کنندگان کی ذمہ داریوں کو بھی اجاگر کئَ جانے کا فیصلہ کیا گیا۔
وزیراعلی خیبرپختونخوا کے زیر صدارت ہونے والے اجلاس میں فیصلہ کیا گیا کہ کرم میں دیہات کی سطح پر قائم کمیٹیوں کو فعال کیا جائے، کرم کو اسلحہ سے پاک کرنے کے لئے دونوں فریق طریقہ کار وضع کر کے جلد از جلد حکومت کے حوالے کریں، جبکہ بگن کے متاثرین کو معاوضوں کی ادائیگی، ان کی حکومت اور انتظامیہ کے ساتھ تعاون سے مشروط ہے۔
اہم اجلاس میں یہ بھِی فیصلہ کیا گیا کہ دونوں اطراف کے عسکریت پسندوں کے خلاف بلا تفریق کارروائی عمل میں لانے سمیت ایف آئی آرز میں نامزد ملزمان کی گرفتاری بھی عمل میں لائی جائے گی، اس سارے عمل میں سول انتظامیہ اور پولیس کو لیڈ رول دیا جائے گا، جبکہ اس دوران دیگر قانون نافذ کرنے والے ادارے سول انتظامیہ کو سپورٹ فراہم کریں گے۔
وزیراعلیٰ کی زیر صدارت ہونے والے اجلاس میں فیصلہ کیا گیا کہ کرم روڈ کی سکیورٹی کے لئے خصوصی دستے تعینات کئے جائیں گے، پولیس اس سلسلے میں عارضی اور مستقل بھرتیوں کے لئے لائحہ عمل کو حتمی شکل دے گی، اس کے ساتھ ہی متاثرہ بگن بازار کی بحالی اور تزین و آرائش کے لئے فوری اقدامات کئے جائیں گے، صوبائی سطح پر بیرسٹر ڈاکٹر سیف کی سربراہی میں قائم مانیٹرنگ کمیٹی کو مزید فعال بنایا جائے گا۔
ذرائع کے مطابق کرم میں امن کی بحالی کے عمل میں سیاسی قیادت اور منتخب عوامی نمائندوں کو کھل کر سامنے آنے کا بھِی فیصلہ کیا گیا، اس کے ساتھ ساتھ فیصلہ کیا گیا کہ علاقے میں بنکرز کے انہدام اور عارضی طور پر نقل مکانی کرنے والے لوگوں کے لئے انتظامات کی نگرانی کے لئے باقاعدگی سے دورے کئے جائیں گے، علاقے میں پولیس کی اضافی نفری تعینات کی جائے گی۔
اجلاس میں علاقے میں امن کو خراب کرنے والے تمام عناصر اور ان کے سہولت کاروں کو گرفتار کر کے ان کے خلاف قانونی کارروائی عمل میں لانے کا فیصلہ کیا گیا، اس کے ساتھ ہی کہا گیا کہ کرم کے معاملے پر میڈیا کے لئے ایک یکساں بیانیہ دیا جائے گا، اور اس کے ساتھ ہی کرم کے معاملے پر منفی پراپیگنڈے کا موثر اور بروقت جواب دیا جائے گا۔

مزید پڑھیں:  لاہور ہائیکورٹ میں تعینات9نئے ایڈیشنل ججز نے حلف اٹھا لیا